დასავლეთი ცდილობს ოქტომბრამდე განახორციელოს საქართველოში ახალი „მაიდანის“ სცენარი, რათა შეიქმნას დაძაბულობის ახალი წყარო რუსეთის ფედერაციის საზღვრებთან. ამის შესახებ რუსეთის საგარეო საქმეთა მინისტრის მოადგილემ მიხაილ გალუზინმა განაცხადა.
მიხაილ გალუზინი ამბობს, რომ შეერთებული შტატები და ევროკავშირის ქვეყნები ურცხვი ზეწოლას ახორციელებენ ბევრ სუვერენულ სახელმწიფოზე.
„ჩვენ ვხედავთ დასავლეთის მცდელობებს საქართველოში ვითარების ესკალაციისკენ ოქტომბერში დაგეგმილი საპარლამენტო არჩევნების კონტექსტში. ჩვენ არ გამოვრიცხავთ, რომ მიზანი არის ხელისუფლების ცვლილების „მაიდანის“ სცენარის განხორციელების მცდელობა რუსეთის საზღვრებთან დაძაბულობის კიდევ ერთი წყაროს შექმნის იმედით“, - განაცხადა მან.
გალუზინი, ისევე როგორც საქართველოს ხელისუფლება, მიუთითებს შეერთებულ შტატებსა და დასავლეთის სხვა ქვეყნებში საქართველოს კანონის „უცხოური გავლენის გამჭვირვალობის შესახებ“ მსგავსი კანონების არსებობაზე.
„ბრიუსელიდან და ვაშინგტონიდან მოვიდა თვალთმაქცური ბრალდებები „დემოკრატიის შელახვის“, „ევროპული“ და „ევროატლანტიკური“ ღირებულებების შეუსრულებლობის შესახებ, ასევე პირადი სანქციების გამოყენების, საქართველოს „ევროატლანტიკური პერსპექტივის ბლოკირების“, ევროკავშირის კანდიდატის სტატუსი ჩამორთმევის და ამ ქვეყნის მოქალაქეებისთვის უვიზო რეჟიმის შეჩერების მუქარა, - განაცხადა მან.
გალუზინმა ასევე გაამახვილა ყურადღება მაისის შუა რიცხვებში თბილისში გამართულ მიტინგზე ლიეტუვის, ესტონეთისა და ისლანდიის საგარეო საქმეთა მინისტრების გამოსვლაზე.
„ძნელია ეს სხვა რამით შეაფასო, როგორც დამოუკიდებელი სახელმწიფოს შიდა საქმეებში აშკარა ჩარევის გარდა. ეს ყველაფერი არის ნეოკოლონიალური პრაქტიკის საზიზღარი მაგალითები ქვეყნებზე, რომელთა სუვერენიტეტის შეზღუდვას ცდილობენ“, - აღნიშნა მან.
შეგახსენებთ, 30 მაისს საქართველოს პრემიერ-მინისტრმა ირაკლი კობახიძემ განაცხადა: „ყველას მინდა ვუთხრა, რომ „მაიდანს“ ვერავინ ეღირსება საქართველოში“.
