"ქართული ლეგიონის" ხელმძღვანელის, თადარიგის გენერალ-მაიორ გიორგი ყარყარაშვილის შეფასებით, ვეტერანთა აქციის დარბევა "შთამბეჭდავი სპექტაკლი იყო".
"შთამბეჭდავი სპექტაკლის მომსწრე გავხდით. ჯერ 27 დეკემბრიდან 3 იანვრამდე კანონიერი აქციის სრული იგნორირება, შემდეგ განაჩენი დარბევის შესახებ სამშვიდობო ხელშეკრულების დარღვევას რომ წააგავს. შემდეგ ყველას შესაშინებლად და ყველას დასანახად დაჭერა-დაპატიმრება, როგორც ბრძოლაში გამარჯვებული უსწორდება ფიზიკურად მოწინააღმდეგეს, სანამ საბოლოოდ არ დატკბება გამარჯვების ხიბლით.
განსხვავებაც არის ჩვეულებრივი ბრძოლისგან, სადაც დაპირისპირებული ორთავე მხარე წესების დაცვით იბრძვის. აქ ბრძოლა წესების გარეშე მიმდინარეობს. იარაღი ჩვეულებრივი ტელევიზიებია და მათი საინფორმაციო გამოშვებები, ხოლო ტყვიები ამ არხებზე მომუშავე ჟურნალისტები", - ნათქვამია ყარყარაშვილის სპეციალურ განცხადებაში.
"ქართული ლეგიონის" ხელმძღვანელი აქციის დარბევასთან დაკავშირებით საპარლამენტო უმრავლესობის მიერ გამოთქმულ შეფასებებსაც ეხმიანება და ყოველივეს "წაქცეული და გაჭირვებული ადამიანების გადავლად" აფასებს.
"გამოძვრებიან პოლიტიკოსები, რათა წაქცეულებს, გაჭირვებულებს პოლიტიკური განცხადებებით და შეფასებებით საბოლოოდ გადაუარონ. გაგიკვირდებათ და ვინ ლაპარაკობს, ზოგი დიდი კაცის "პატარა" ძმაა, ზოგი კი უბრალოდ "პატარა" კაცი. თანაგრძნობისა და მხარდაჭერის ნაცვლად, მემორიალის წაბილწვას აბრალებენ ვეტერანებს ყველაფრის დასრულების შემდეგ. დაახლოებით ისე, როგორც ბრძოლის ველზე ხდება: ბრძოლაში დამარცხებული, ბრძოლის ველზე თავდადებული მიცვალებულების უსულო ცხედრებს, რომელსაც წინააღმდეგობის გაწევა აღარ შეუძლია, უცბად საიდანღაც გამომძვრალი ათასი სახის ჭია და მატლი მიესევა როგორც ნადავლს, რათა შეურაცხყოფილად და წაბილწულად აქციონ სულ ცოტა ხნის წინ მჩქეფარე ცოცხალი სული", - აღნიშნულია განცხადებაში.
ყარყარაშვილი მწუხარებას გამოთქვამს იმის გამო, რომ "გარკვეული მიზეზების გამო", საერთაშორისო თანამეგობრობის წარმომადგენლებმა ამ "სპექტაკლის" ყურება ვერ შეძლეს და შესაბამისად, მას სათანადო შეფასება ვერ მისცეს.
"სამწუხაროდ, უფრო სწორად, როგორც ხშირ შემთხვევაში ხდება ხოლმე, საერთაშორისო თანამეგობრობის წარმომადგენლები, პატივსაცემი ელჩები, გარკვეული მიზეზების გამო, სპექტაკლს ვერ უყურებენ და შეფასებებს არ აკეთებენ", - ნათქვამია განცხადებაში.
ყარყარაშვილი "ჰუმანურად" აფასებს რიგი სამართალდამცველების პოზიციას, რომელიც "ქართული ლეგიონის" ხელმძღვანელის შეფასებით, "ადამიანობით გამოირჩეოდნენ".
"ამ სპექტაკლში დადებითი პერსონაჟებიც არიან. ყველაზე უფრო დიდი მოულოდნელობა დასარბევად მოსული პატრულის ქმედება იყო. იქ ვიხილე კეთილშობილი და კეთილსინდისიერი თანამშრომლები, კაცთმოყვარე და ჰუმანური ადამიანები, რომლებიც ადამიანობით გამოირჩეოდნენ. თითქმის ყველა, სამშობლოს ზუსტად ისეთი ჯარისკაცები, როგორებიც 18 წლის წინ გაგრა-ლესელიძის ბრძოლაში მინახავს, რომლებიც ჩემს ძმასთან ერთად დაეცნენ და უგზო-უკვლოდ დაიკარგნენ", - აცხადებს ყარყარაშვილი.
"ქართული ლეგიონის" ხელმძღვანელი მადლობას უხდის სახალხო დამცველს და მის აპარატს ვეტერანთა აქციის დარბევის "ობიექტურად" შეფასების გამოც და აცხადებს, რომ მისთვის ეს "მოულოდნლი და სასიამოვნო" იყო.
"მადლობას ვუხდი ყველას, ვინც მხარდაჭერა და თანაგრძნობა გამოუცხადა ვეტერანებს", - ამბობს ყარყარაშვილი.
