კიევის სააპელაციო სასამართლომ უკრაინის ყოფილი შს მინისტრი იური ლუცენკო პატიმრობაში დატოვა და უარი განაცხადა პეჩორის სასამართლოს მიერ გამოტანილი განაჩენის შეცვლაზე. ლუცენკოს ადვოკატები პატიმრობის შეცვლას გაუსვლელობის ხელწერილით ითხოვდნენ, თუმცა სასამართლომ "ვერ ნახა საკმარისი მტკიცებულებები პეჩორის სასამართლოს მიერ გამოტანილი განაჩენის შესაცვლელად".
აღსანიშნავია, რომ კიევის პეჩორის სასამართლომ უკრაინის ყოფილი შს მინისტრის იური ლუცენკოს დაპატიმრებაზე სანქცია გასცა. ლუცენკოს ბრალი სამსახურებრივი მდგომარეობის ბოროტად გამოყენებაში ედება. ლუცენკოს ბრალად ედება უკრაინის ყოფილი პრეზიდენტის, ვიქტორ იუშჩენკოს მოწამვლის საქმეში უკანონო ოპერატიულ-სამძებრო ღონისძიებების ჩატარება.
უკრაინის ყოფილი შს მინისტრი საკუთარ სახლთან დააკავეს და საგამოძიებო იზოლატორში წაიყვანეს.
დაკავებულმა ადვოკატის მეშვეობით განაცხადა, რომ მისი აზრით, მის დადანაშაულებას ვიქტორ იუშჩენკოს მოწამვლაში ცდილობენ.
შეგახსენებთ, რომ 2004 წელს უკრაინაში საპრეზიდენტო კამპანიის მიმდინარეობის დროს პრეზიდენტობის კანდიდატმა ვიქტორ იუშჩენკომ თავი შეუძლოდ იგრძნო და სასწრაფოდ ავსტრიაში გადაიყვანეს. კერძო კლინიკაში მედიკოსებმა განაცხადეს, რომ მის ორგანიზმში ნივთიერება დიოქსინი აღმოჩნდა. გამოძიების ვერსიით, იუშჩენკო 2004 წლის 5 სექტემბერს უკრაინის უშიშროების საბჭოს მაშინდელი პირველი მოადგილის ვლადიმერ საციუკის აგარაკზე მოწამლეს.
2008 წლიდან უკრაინაში ხელისუფლები ცვლილებამდე გენპროკურატურა აცხადებდა, რომ იუშჩენკოს განზრახ მოწამვლის ფაქტი დადასტურებულია. უკრაინაში ხელისუფლება მიმდინარე წლის თებერვალში შეიცვალა და ხელისუფლების სათავეში იუშჩენკო ნაცვლად იანუკოვიჩი მოვიდა. საპრეზიდენტო არჩევნების შემდეგ კი შეიცვალა საგამოძიებო ჯგუფი, რომელიც იუშჩენკოს მოწამვლის ფაქტს იძიებს.
