საკრედიტო სარეიტინგო კომპანია „ Moody's Investors Service "-მა, 2010 წელს, საქართველოს სუვერენული რეიტინგი „Bა3" („Not-Prime foreign and local currency issuer ratings ") პირველად მიანიჭა.
რეიტინგი სტაბილურია. კომპანიის მიერ საქართველოსთვის აღნიშნული რეიტინგის მინიჭება ასახავს:
ქვეყნის პროგრესს - სოციალური, პოლიტიკური და ეკონო-მიკური ინსტიტუტების დაფუძნებასა და ბიზნესისათვის ჯანსაღი გარემოს შექმნაში;
მთავრობის პროაქტიულ პასუხს გლობალურ ეკონომიკურ კრიზისსა და 2008 წლის რუსეთთან ომზე; ასევე, გეოპოლიტიკურ რისკს.
Moody's -ის მიხედვით, საქართველო, უკანასკნელ პერიოდში, მნიშვნელოვნად გაძლიერდა ინსტიტუციურად, რამაც ხელი შეუწყო ქვეყანაში კაპიტალის შემოდინებას და ეკონომიკურ ზრდას, სახელმწიფო ვალის დასაშვებ დონეზე შენარჩუნების პირობებში.
აღსანიშნავია, რომ საქართველოში მნიშვნელოვნად შემცირდა კორუფცია.
ქვეყნის ხელისუფლებამ დიდი ძალისხმევა გასწია არსებული კორუფციის დასაძლევად, ლიბერალური ეკონომიკური გარემოს შესაქმნელად, რამაც ასახვა ჰპოვა ბიზნესისათვის სასურველი გარემოს ჩამოყალიბებაში.
Moody's -ის მიხედვით, საქართველოს მთავრობას აქვს საიმედო პროგრამა სახელმწიფო ბიუჯეტის დეფიციტის გასული წლის 9%-დან მომავალ წლებში 2%-3%-მდე შესამცირებლად.
Moody's -ის მიერ საქართველოსთვის მინიჭებული რეიტინგის რისკ ფაქტორად საქართველო-რუსეთის მოუგვარებელი ურთიერთობებია დასახელებული.