2010 წლის მონაცემებით საქართველოს დაცულ ტერიტორიებზე ტურისტების რიცხვმა 150 000-ს მიაღწია.
ამის შესახებ "ჯი-ეიჩ-ენს" დაცული ტერიტორიების სააგენტოდან აცნობეს.
მათი ინფორმაციით, წინა წელთან შედარებით ეროვნულ პარკებში ვიზიტორების რაოდენობის 50%-იანი ზრდა დაფიქსირდა, მიუხედავად სათაფლიის ნაკრძალში ზაფხულის განმავლობაში მიმდინარე სარეაბილიტაციო სამუშაოებისა.
დაცული ტერიტორიების სააგენტომ ეროვნულ პარკებში 2010 წელს საერთაშორისო სტანდარტის სერვისი და ახალი ტურისტული პროდუქტები დანერგა, როგორიცაა: სამთო ველოსიპედით სეირნობა, პალეონტოლოგიური ტური, დელფინების ტური, ფოტო-ტური და ა.შ. აგრეთვე მიმდინარე წელს სააგენტომ დანერგა ჯგუფურ ტურებზე ფასდაკლების სისტემა.
ეროვნული პარკების და ნაკრძალების განვითარების მიზნით 2010 წელს დაცული ტერიტორიების სააგენტომ 9 845 000 ლარის გრანტი მოიზიდა. მოეწყო ახალი ტურისტული ინფრასტრუქტურა სათაფლის ნაკრძალში და ბორჯომ-ხარაგაულის ეროვნულ პარკში.
2011 წელს იგეგმება ახალი ტურისტული ინფრასტრუქტურის მოწყობა ყაზბეგის და კინტრიშის დაცულ ტერიტორიებზე. დაცული ტერიტორიების სააგენტო მომავალ წელს ეროვნულ პარკებში ტურისტების რიცხვის 200%-იან ზრდას ელოდება.
დაცული ტერიტორიების სისტემის ქსელის განვითარებისა და გაფართოების მიზნით, 2011 წელს იგეგმება ახალი დაცული ტერიტორიების დაარსება.
