საქართველოში წლის განმავლობაში უმუშევართა რაოდენობა 0,4 %-ით შემცირდა.
ამის შესახებ საქართველოს პრემიერ-მინისტრმა ნიკა გილაურმა წლის შემაჯამებელ პრესკონფერენციაზე განაცხადა.
"მცირედ, 0,4 %-ით შემცირდა უმუშევრობის რაოდენობა, მაგრამ მაინც აღნიშვნის ღირსია", - განმარტა გილაურმა.
ამასთან, აღსანიშნავია, რომ მომავალ წელს მთავრობა 4,5 %-იან ეკონომიკურ ზრდას პროგნოზირებს, 2-3 წელიწადში კი, გილაურის გათვლებით, საქართველოში ორნიშნა ეკონომიკური ზრდის მაჩვენებელი დაფიქსირდება.
"წელს იქნება ახალი საგადასახადო კოდექსის გამოცდის წელი და თუ გავითვალისწინებთ იმ მზარდ ტენდენციას, რაც წლის განმავლობაში ფიქსირდებოდა, 2011 წელს 4,5 %-იან ეკონომიკურ ზრდას მაინც უნდა ველოდოთ. 2-3 წელში კი ეს მაჩვენებელი უკვე ორნიშნა რიცხვში იქნება გამოხატული", - დასძინა პრემიერმა.
ამასთან, გილაურმა მთავრობის მიერ "ქამრების შემოჭერის" პოლიტიკასა და ადმინისტრაციული ხარჯების შემცირებაზეც ისაუბრა და აღნიშნა, რომ ოპტიმალური შედეგი უკვე მიღწეულია.
"ადმინისტრაციული ხარჯების ამაზე მეტად შემცირება აღარ შეიძლება", - აღნიშნა ნიკა გილაურმა.
