"ანაკლიის ტურისტულ ზონაში" სასტუმროების მშენებლობის სურვილი 4 კომპანიამ გამოთქვა. როგორც დღეს საქართველოს პრემიერ-მინისტრმა ნიკა გილაურმა 2010 წლის შეჯამებისას განაცხადა, "ანაკლიის ტურისტულ ზონაში" სასტუმროების აშენების სურვილი 4 სუბიექტმა დააფიქსირა, რაც ნიკა გილაურის აზრით, საკმაოდ დაბალი მაჩვენებელია. პრემიერი იმედს გამოთქვამს, რომ დარჩენილ ვადაში ბიზნესმენები უფრო გააქტიურდებიან და ანაკლიის ტურისტულ ზონაში სასტუმროების აშენების სურვილს უფრო თამამად გამოთქვამენ.
"ჯერჯერობით ანაკლიის ტურისტულ ზონაში სასტუმროების აშენების მსურველი ინვესტორთა დაინტერესება ნაკლებია. ამ დროისათვის მხოლოდ 4 განაცხადია შემოტანლი, თუმცა იანვრის ბოლომდე ინვესტორებს განაცხადის შემოტანის ვადა აქვთ და იმედი მაქვს, რომ ისინი გააქტიურდებიან. 2011 წელს მინდა ინვესტორებს გააქტიურება ვუსურვო, რათა იყვნენ უფრო თამამები"- განაცხადა ნიკა გილაურმა.
პრემიერ-მინისტრის განმარტებით, 2010 წელს ბათუმში ოთხი ახალი სასტუმრო შევიდა ექსპლუატაციაში, რამაც აჭარას და ზოგადად ბათუმს მეტი დატვირთვა მისცა.
შეგახსენებთ, რომ ეკონომიკისა და მდგრადი განვითარების სამინისტროს ინფორმაციით, საქართველოს შავიზღვისპირეთის დიდი კურორტის, ანაკლიის მშენებლობა დაიწყო.
სამინისტროში აცხადებენ, რომ საუკეთესო საზღვაო კლიმატის მქონე სანაპირო ზოლზე სახელმწიფო სასტუმროების მშენებლობისთვის უპრეცედენტო პირობებია - მიწა, სასტუმროს პროექტები და ყველა კომუნიკაცია ინვესტორებისთვის სახელმწიფოსგან საჩუქრად. ინვესტორი 15 წლით გათავისუფლება მოგებისა და ქონების გადასახადისგან. სახელმწიფო ახალ კურორტზე მინერალურ წყალს უფასოდ მიიყვანს, აშენდება ახალი აეროპორტი ანაკლია-ზუგდიდის ტურისტულ ზონაში, კურორტი ზღვაზე იახტკლუბით.
ინვესტორებისთვის გადასაცემი უფასო მიწის ნაკვეთები განლაგებულია ესპანელი არქიტექტორების დაპროექტებული ბულვარის გასწვრივ.
დაინტერესებული ინვესტორების განაცხადების მიღების ბოლო ვადაა 2011 წლის 30 იანვარი.