საქართველოს სახელმწიფო ელეტროსისტემის 2010 წლის გეგმით, 500-330-220-110 კვ. ქსელის პირველად მოწყობილობებზე დამონტაჟებულია: 87 ერთეული ამომრთველი, 400 ერთეული დენის ტრანსფორმატორი, 218 ერთეული გამთიშველი, 62 ერთეული მცლელი, 93 ერთეული ძაბვის ტრანსფორმატორი.
მოწყობილობების დამონტაჟების მცირე ნაწილი 2011 წელში გადადის და 20 თებერვლამდე მათი მონტაჟი მთლიანად დასრულდება.
რეაბილიტაციის პროგრამით მიმდინარეობს "ნავთლუღი-220"-ის სრული რეაბილიტაცია. კეთდება შემოვლითი სისტემა, რომელიც აქამდე ქვესადგურს არ გააჩნდა. ქვესადგური 1949 წელს აშენდა და პროექტში შემოვლითი სისტემა არც ყოფილა ჩადებული. "ნავთლუღი 220"-ში დასრულებულია ახალი მართვის ფარის მშენებლობაც. აგრეთვე, მიმდინარეობს ნავთლუღის 35-110-220-კვ-ის და გარდაბნის 110 კვ-ის სრულიად ციფრული ტექნოლოგიებით აღჭურვა, რომელსაც "საქართველოს სახელმწიფო ელექტროსისტემა" კომპანია ABB-სთან ერთად ახორციელებს. ღია გამანაწილებელ მოწყობილობაზე დამონტაჟდება დისტანციური მართვა, რაც მინიმუმამდე დაიყვანს რისკს და ქვესადგურის პერსონალს ზემოთაღნიშნულ ქვესადგურებში აღარ მოუწევს გადართვებზე სიარული. სსე-ის ისტორიაში ეს იქნება პირველი ორი ქვესადგური, რომელზეც თავიდან ბოლომდე იქნება განხორციელებული ციფრული დაცვა და ახალი ტექნოლოგიები. სრული ტემპით არის უკვე დატვირთული ზეთის რეგენერაციის ქარხანა. ბოლო ორი თვის განმავლობაში უკვე ცხრა ტრანსფორმატორის ზეთის გაჯანსაღებას ჰქონდა ადგილი. მუშაობს რემონტების ჯგუფი.
კუკია-ვარკეთილის ხაზზე მიმდინარეობს ახალი უბნის მშენებლობა. ეს არის 2 კილომეტრამდე მონაკვეთი, რომელზეც აშენდა სრულიად ახალი ტრასა. ამ მონაკვეთში მოხდება კუკია-ვარკეთილის 220 კვ-იანი ხაზების გაორჯაჭვიანება. ზემოთაღნიშნული გადაწყვეტილება მიღებულ იქნა მეწყერის სიმრავლის გამო. მოხდა სისტემაში არსებული მარაგების (უმოქმედო ხაზები, ხაზებზე მდებარე ანძები) გამოყენება. ანძების დაშლა, გადმოტანა და აწყობა სსე-მ საკუთარი ძალებით განახორციელა.
კუკია-ვარკეთილის ხაზის დასრულების შემდეგ, "საქართველოს სახელმწიფო ელექტროსისტემა" ამ მონაკვეთში შეძლებს ოპტიკურ-ბოჭკოვანი კაბელის გადატანას. ოპტიკურ-ბოჭკოვანი სადენების მონტაჟის გამოცდილება კომპანიას აქამდე არ ჰქონია. ეს არის პირველი და წარმატებული პროექტი სსე-ის ისტორიაში.
კახეთის რეგიონში ადგილობრივი ძალებით გარემონტდა ორი 35 კვ-იანი ძალოვანი ტრანსფორმატორი. ამჟამად მიმდინარეობს 110 კვ-ის ძალოვანი ტრანსფორმატორის რემონტი, რომელიც რამდენიმე დღეში დასრულდება. საყურადღებოა, რომ სამუშაოები მიმდინარეობს სსე-ის ძალებით.
ასევე, დასასრულს უახლოვდება წყალტუბოს ქვესადგურის შემოღობვ, რის შედეგადაც დასავლეთ საქართველოში ქვესადგურების შემოღობვის სამუშაოები სრულიად დამთავრდება. გარდა ბათუმის ქვესადგურისა, სადაც ზემოთაღნიშნული სამუშაოები მომავალ წელს განხორციელდება.
2011 წელს იგეგმება 4 ქვესადგურის 6-10 კვ-ის გამანაწილებლების შეცვლა და ახლით ჩანაცვლება. უკვე შეკვეთილია ძაბვის და დენის ტრანფორმატორების დარჩენილი ნაწილი. 2011 წელში სრულიად დასრულდება ყველა დენის და ძაბვის ტრანსფორმატორის გამოცვლა, გარდა კახეთის რეგიონისა, რაც მნიშვნელოვნად შეამცირებს ავარიების რიცხვს. ავარიების გამომწვევ მიზეზს ძირითადად ტრანსფორმატორების გაუმართავობა და ხანდაზმულობა წარმოადგენდა. მოგახსენებთ, რომ მათი სასიცოცხლო პერიოდი შეადგენს 20-25 წელს, სისტემაში კი იყო ტრანსფორმატორები, რომელთა ასაკი 40 წელს აღემატებოდა. შესაბამისად, რეაბილიტაციის პროექტის დასრულების შემდეგ ეს პრობლემა აღმოფხვრილი იქნება.
ელექტროგადამცემ ხაზზე "იმერეთი", რომელიც წარმოადგენს ენგურთან დამაკავშირებელ 500 კვ-იან ხაზს, შეიცვალა და დადგა ახალი ციფრული დაცვები, რაც საგრძნობლად გაზრდის ამ ხაზის იმედიანობას. Pპროექტი განხორციელდა კომპანია "სიმენსთან" ერთად. მონტაჟში მონაწილეობდნენ სსე-ის სარელეო დაცვის თანამშრომლები.
"ენერგოტრანსსა" და "საქრუსენერგოსთან" ერთად, მიმდინარე წელს დამთავრდება ერთ-ერთი უმნიშვნელოვანესი პროექტის განხორციელება. კერძოდ, ერთმანეთთან გადაერთდება "მუხრანისა" და "ვარძიის" 500 კვ-იანი ეგხ-ები, რაც წარმოადგენს "ქართლი"-1-ის ალტერნატიულ ხაზს და ერთმანეთთან აკავშირებს "ქსანი-500"-ისა და "გარდაბანი-500"-ის ქვესადგურებს.