2011 წელს სახელმწიფო საკუთრებაში არსებული "თელასის" აქციები საერთაშორისო საფონდო ბირჟებზე გაიყიდება.
როგორც დღეს, ენერგეტიკის სამინისტროში, 2010 წლის მოვლენების შემაჯამებელ ბრიფინგზე უწყების ხელმძღვანელმა ალეკო ხეთაგურმა განაცხადა, "ინტერ რაო ეესთან" შესაბამისი მოლაპარაკებები უკვე მიმდინარეობს.
"ინტერ რაო ეესთან" მიმდინარეობს მოლაპარაკება, რათა 2011 წლის ბოლომდე დაიდოს შესაბამისი დასკვნა და სახელმწიფოს საკუთრებაში არსებული "თელასის" აქციების გარკვეული ნაწილი საერთაშორისო ბირჟებზე განთავსდეს", - განმარტა ხეთაგურმა.
გარდა ამისა, მინისტრის ინფორმაციით, ამ დროისთვის სახელმწიფო "თელასის" აქციათა 24 პროცენტს ფლობს, თუმცა სრულად განთავსდება თუ არა ის საერთაშორისო საფონდო ბირჟებზე, ხეთაგური არ აკონტროლებს.
შეგახსენებთ, რომ თბილისის ელექტროგამანაწილებელი კომპანიის სს "თელასის" აქციების 75%, თბილსრესის მე-9 ენერგობლოკი (სს "მტკვარი ენერგეტიკა") და სს "ეიეს ტრანსენერჯი", რომელიც თურქეთში ელექტროენერგიის ექსპორტის განსახორციელებლად შეიქმნა 2003 წლის 1 სექტემბრიდან კომპანია "ინტერ რაო ეესის" მფლობელობაში გადავიდა. აგრეთვე, მას მიენიჭა ჰიდროელექტროსადგურების "ხრამი-1" და "ხრამი-2" მართვის უფლება. გარდა ამისა, "ინტერ რაო ეესის" საკუთრებაშია ერთობლივი საწარმოს "საქრუსენერგოს" 50%-ანი წილი.
