ნავთობპროდუქტების იმპორტიორთა კავშირი 2010 წელს აჯამებს. კაცშირის ინფორმაციით, ნავთობის ფასი მთელი მიმდინარე წლის განმავლობაში იზრდებოდა, კერძოდ, 72-74 დოლარიდან 92-94 დოლარამდე ბარელზე, რომელიც თავის მხრივ გახლავთ ბოლო პერიოდის რეკორდულად ყველაზე მაღალი მაჩვენებელი. ნავთობის ფასი განსაკუთრებით ბოლო 3 თვის განმავლობაში გაიზარდა.
"რაც შეეხება საერთაშორისო ფასებს Platt`s-ის მიხედვით, რომლითაც ხორციელდება საქართველოში საწვავის იმპორტი, ისინიც მნიშვნელოვნადაა გაზრდილი წლის დასაწყისიდან. კერძოდ, ბენზინის ფასი გაზრდილია საშუალოდ 680 დოლარიდან 843 დოლარამდე/ტონაზე, ხოლო დიზელის საწვავის ფასი - 630 დოლარიდან 770 დოლარამდე/ტონაზე"- განმარტავენ ნავთობპროდუქტების იმპორტიორთა კავშირში.
მათი ინფორმაციითვე, ნავთობის ფასისა და საერთაშორისო ფასების ზრდის შედეგად მოხდა ასევე საწვავის ფასების მატება საქართველოს საცალო ქსელში. წლის განმავლობაში ქვეყნის საცალო ქსელში საწვავის ფასები საშუალოდ გაზრდილია 25-30 თეთრით ლიტრაზე.
აქვე უნდა აღინიშნოს, რომ მიმდინარე წლის განმავლობაში საქართველოში საწვავის მოხმარება მიუხედავად მისი მაღალი ფასისა არ შემცირებულა. შესაბამისად, ნავთობპროდუქტების სექტორიდან სახელმწიფო ბიუჯეტში შენატანი თანხა მიმდინარე წელს უფრო მაღალი იქნება გასული წლის მაჩვენებელთან შედარებით.
კავშირში აცხადებენ, რომ მიმდინარე წელს მნიშვნელოვანი ინვესტიციები განხორციელდა ისეთი ნავთობკომპანიების მხრიდან, როგორებიცაა ,,სოკარი" (40 მლნ ლარი), ,,ვისოლ პეტროლიუმ ჯორჯია" (20 მლნ დოლარი), ,,რომპეტროლ საქართველო", ,,ლუკოილ ჯორჯია".
"2010 წლის განმავლობაში მოხდა ავტოგასამართი სადგურების ქსელის მნიშვნელოვანი განვითარება. 35 ახალი ავტოგასამართი სადგური ააშენა წლის განმავლობაში კომპანია "სოკარმა", 12 გასამართი სადგური კომპანია ააშენა ,,ვისოლ პეტროლიუმ ჯორჯიამ". ახალი ავტოგასამართი სადგურები შემატეს ასევე თავიანთ ქსელს კომპანიებმა ,,რომპეტროლი" , ,,ლუკოილ ჯორჯია"და სხვ.
2010 წელს უფრო აქტიურად განხორციელდა მიმდინარე წელს კომპანიების გამსხვილების პროცესი არსებული მძაფრი კონკურენციიდან გამომდინარე, რაც გამოხატულია მსხვილი კომპანიების საცალო ქსელის გაფართოებით"- განმარტავენ ნავთობპროდუქტების იმპორტიორთა კავშირში.
