საქართველოს ფოსტის პრივატიზაციისთვის ისეთი კომპანია შეირჩევა, რომელსაც ამ სფეროში გამოცდილება აქვს. ამის შესახებ ჟურნალიტებს ეკონომიკისა და მდგრადი განვითარების მინისტრმა ვერა ქობალიამ განუცხადა.
"მომავალ წელს საქართველოს ფოსტის პრივატიზაცია იგეგმება. თუმცა ყველა წინადადებას, რომელიც ამ კუთხით შემოდის ძალიან დეტალურად ვსწავლობთ, რადგან ჩვენთვის მნიშვნელოვანია - ის კომპანია, რომელიც აირჩევა ფოსტის საპრივატიზაციოდ, იყოს ძლიერი და ამ სფეროში გამოცდილება ჰქონდეს. ეს იქნება გერმანიის ფოსტა, ამერიკის თუ სხვა", - აღნიშნა მინისსტრმა.
ფინანსთა მინისტრ კახა ბაინდურაშვილის განმარტებით, 2011 წელი პრივატიზაციის კუთხით არც ისე მასშტაბური იქნება, რადგან სახელმწიფო საკუთრებაში არსებული ობიექტების უმეტესობა უკვე გაიყიდა.
ბაინდურაშვილის ინფომაციით, სახელმწიფომ რამდენიმე მნიშვნელოვანი მიწის ნაკვეთის პრივატიზაცია მომავალი წლისთვის გადადო, გარდა ამისა, დარჩენილია დაახლოებით რვა ობიექტი, რომლის პრივატიზაციიდან მთავრობა 150 მლნ. ლარის მობილიზებას ელოდება.
შეგახსენებთ, რომ 20 დეკემბერს ეკონომიკისა და მდგრადი განვითარების სამინისტროში, "საქართველოს ფოსტის" გასხვისებასთან დაკავშირებით, განაცხადების მიღება უნდა შეწყვეტლიყო, თუმცა სამინსტოს განაცხადების შეტანის ვადა გაურკვეველი ვადით გაახანგრძლივა.
"საქართველოს ფოსტის" აქციათა 100%-ის მფლობელი სახელმწიფოა. შპს "საქართველოს ფოსტა" ქართულ საფოსტო ბაზარზე მთავარი საფოსტო ოპერატორია. კომპანია ოპერირებს მთელი ქვეყნის მასშტაბით და ფლობს დაახლოებით 87 000 კვ.მ. მიწას და შენობებს საერთო ფართით 100 000 კვ.მ.. ეკონომიკისა და მდგრადი განვითარების სამინისტროს ინფორმაციით, კომპანიას აქვს ყველაზე სანდო საფოსტო მომსახურების გაწევის იმიჯი. მისი ოფისები მთელი ქვეყნის ტერიტორიაზეა განლაგებული. ამ მახასიათებლების გათვალისწინებით შპს "საქართველოს ფოსტა" საუკეთესო ინვესტირების საშუალებას იძლევა.
საქართველოს მთავრობა მზადაა განიხილოს სხვადასხვა შემოთავაზება პოტენციური მყიდველების მხრიდან კომპანიის სამომავლო განვითარების შესახებ.