საქართველოს პრემიერ-მინისტრი ინფლაციის მაჩვენებელზე საუბრობს. როგორც გილაურმა დღეს მთავრობის შემაჯამებელ სხდომაზე განაცხადა, ამ დროისათვის ინფლაციის მაჩვენებელი 10,5 %-ია.
"პირდაპირი უცხოური ინვესტიციების მაღალი მაჩვენებლის გარდა, პარამეტრი, რომლის შეცვლასაც ვისურვებდი, არის ინფლაცია. ინფლაცია ჯერჯერობით არის 10,5 %-ზე, ეს 2010 წლის საბოლოო შედეგი არ არის. თუმცა, ეს ყველაფერი მოსახლეობაზე ცუდად აისახება. განსაკუთრებით იმ პირობებში, როდესაც გაიზარდა საკვები პროდუქტების ფასები, გაიზადა ფასები პირველადი მოხმარების საგნებზე, რაც 2010 წლის უარყოფითი შედეგია",- აღნიშნა ნიკა გილაურმა.
პრემიერ-მინისტრის განმარტებით, საქართველოს მთავრობა ყველა ღონეს ხმარობს იმისათვის, რომ მოსახლეობას ტვირთი შეუმსუბუქდეს.
"ჩვენ ვაკეთებთ ყველაფერს, რაც მთავრობას შეუძლია. ჩვენთვის შეუძლებელია, რომ ინფლაცია შევაჩეროთ და ფასების რეგულაცია შემოვიტანოთ. მთავრობას აქვს პროგრამები, რომელიც აუცილებელია იმისათვის, რომ მოსახლეობას ფასების ზრდის პრობლემა გარკვეულწილად შევუმსუბუქოთ. ასევე გვაქვს სოფლის მეურნეობის პროგრამები, რომელიც მოემსახურება იმას, რომ 2011 წლიდან ადგილობრივი პროდუქცია იმპორტირებულს ჩაენაცვლოს",- აღნიშნა ნიკა გილაურმა.