ეკონომიკისა და მდგრადი განვითარების მინისტრი ვერა ქობალია ყველას მოუწოდებს, ვისაც 4 მილიონი აქვს, მესტიის პროექტებში ჩადოს და სასტუმროები ააშენოს. ვისაც სახლში 100 ათასი უდევს, მცირე საწარმოები შექმნას.
ამის შესახებ ქობალიამ დღეს ახალციხის რაიონის სოფელ წნისში მდებარე აგროსამრეწველო საწარმოების _ ყველისა და საქონლის კომბინირებული საკვების დამამზადებელი ქარხნების დათვალიერებისას განაცხადა.
"მნიშვნელოვანია საშუალო და მცირე ბიზნესის განვითარება. უნდა შეიქმნას ასეთი ტიპის საწარმოები, რადგან ეს ადგილობრივი ფერმერისთვის შედეგის მომტანია დღესვე, ხოლო დიდი ინვესტიციის ამუშავებას 5-10 წელი სჭირდება. ჩვენ რამდენიმე დღის წინაც გვქონდა საუბარი, სადაც ვთქვი, რომ ვისაც სახლში 4 მილიონი უდევს, მოვუწოდებ ჩადოს მესტიის პროექტებში და ააშენოს სასტუმრო, ხოლო ვისაც 100 ათასი აქვს, მსგავსი ტიპის ქარხნები შექმნას, რაც ადგილობრივი მოსახლეობისთვისაც და ფერმერებისთვისაც სასარგებლო იქნება", - აღნიშნა ქობალიამ.
მისივე თქმით, მსგავსი სახის ინვესტიციები სოფლის მეურნეობის განვითარებისთვის განსაკუთრებით მნიშვნელოვანია.
"ადგილობრივ ფერმერებს საშუალება ეძლევათ აღნიშნულ საწარმოში რძე ჩააბარონ. ლიტრ რძეში 85 თეთრს იხდიან.
იმედი გვაქვს, რომ მსგავსი სახის და უფრო დიდ საწარმოებსაც მომავალში კიდევ არაერთს გავხსნით. ახალციხის საწარმოს მიერ გამოშვებული პროდუქციის გატანა ადგილობრივ ბაზარზე ხდება, თუმცა მისი გაფართოების შემდეგ პროდუქცია საექსპორტოდაც გავა", - აღნიშნა ეკონომიკის მინისტრმა.
ქობალიამ მოსახლეობას მოუწოდა, რომ ვინც სამსახურს ეძებს, ვაკანსიები არა მხოლოდ დიდ ქარხნებში ეძებონ, ასევე მცირე და საშუალო ბიზნეს სექტორშიც, მათ შორის რეგიონებშიც.
შეგახსენებთ, რომ 2008 წელს შპს "ჯორჯიან ბიზნეს ზონ"-მა მონაწილეობა მიიღო ფონდი ათასწლეულის გამოწვვა საქართველოს მიერ გამოცხადებულ კონკურსში "აგრობიზნესის განვითარების პროექტი", სადაც გამარჯვების შემდეგ თანადაფინანსების სახით 125 ათასი დოლარი მიიღო. ამავე კომპანიამ გაიმარჯვა "ქეა - საერთაშორისო კავკასიაში"-ს მიერ გამოცხადებულ კონკურსში "ფერმერები და ბაზარი", საიდანაც ასევე თანადაფინანსების წესით 50 ათასი დოლარი მიიღო.
2009 წელს რძის გადამამუშავებელმა საწარმომ სტანდარტის საერთაშორისო ხარისხი IშO: 9001 და IშO:O22 000 მიიღო.
შპს "ჯორჯიან ბიზნეს ზონი" სავაჭრო ბაზარზე ცნობილია ნიშნით "ახალციხური". საწარმოში დასაქმებულია 30 ადამიანი და არაპირდაპირი მოსარგებლე 300 ფერმერი.
აღსანიშნავია, რომ დღეს მინისტრმა ახლადგახსნილ ყველის დამამზადებელ ქარხანაში 6 თავი ყველი თავად ამოიყვანა.
"ბაზარზე ეს პროდუქცია საკმაოდ ძვირად გაიყიდება, მაგრამ რადგან კარგად არ ვიცი ყველის ამოყვანა, ეს პროდუქტი ახლა იაფი ეღირება",-აღნიშნა ვერა ქობალიამ.