დიდი ბრიტანეთისა და ჩრდილოეთ ირლანდიის გაერთიანებული სამეფოს მონარქს, ჩარლზ მესამეს კიბოს დიაგნოზი დაუსვეს. იტყობინება ბრიტანული მედია ბაქინგემის სასახლეზე დაყრდნობით.
სამეფო კარის მიერ გავრცელებულ განცხადებაში არ არის დაკონკრეტებული, თუ რა ტიპის კიბო აქვს მეფეს. თუმცა სასახლემ დაადასტურა, რომ მეფეს პროსტატის კიბო არ აქვს, რითაც უარყო მედიაში გავრცელებული ვარაუდი. მედია ვარაუდობდა, რომ მეფეს შეიძლება პროსტატის კიბო ჰქონოდა, რადგან რამდენიმე დღის წინ, იგი პროსტატასთან დაკავშირებული პრობლემების გამო კლინიკაში იმყოფებოდა.
იუწყებიან, რომ ექიმებმა მეფეს ურჩიეს, დროებით თავი შეიკავოს საზოგადოებრივ აქტივობებში ჩართულობისგან.
"მონარქი პოზიტიურად არის განწყობილი დაგეგმილი მკურნალობის მიმართ და მოუთმენლად ელის, როდის შეძლებს, დაუბრუნდეს თავის საქმიანობას. მისმა უდიდებულესობამ გადაწყვიტა, მისი დიაგნოზის შესახებ ინფორმაცია გაესარაჯოებინა, რადგან თავიდან აცილებულიყო სპეკულაციები", - ნათქვამია სამეფო კარის განცხადებაში.
75 წლის მეფე სანდრინგემის მამულიდან ლონდონში დაბრუნდა, რათა შეუდგეს მკურნალობას.
