საქართველოს ფინანსთა მინისტრის კახა ბაინდურაშვილის შეფასებით, ქართული ეკონომიკის 6%-იანი ზრდა სწორად განსაზღვრული სტრატეგიის დამსახურებაა.
ამის შესახებ ბაინდურაშვილმა წლის შემაჯამებელ პრესკონფერენციაზე აღნიშნა.
"ეკონომიკის 6% ზრდის მიზეზი რამდენიმე ფაქტორი გახდა. ძირითადად ეს იყო სახელმწიფოს მიერ სწორი ინვესტიციების განხორციელება ინფრასტრუქტურაში, რითიც შევინარჩუნეთ კერძო სექტორის აქტივობა, განსაკუთრებით კი სამშენებლო სექტორის, რომელსაც მსოფლიო ეკონომიკის კრიზის შემდგომ საფრთხე ემუქრებოდა. სახელმწიფო ინვესტიციებმა ფაქტიურად ეს მიმართულება გადაარჩინა, ასევე შესაბამისად პრობლემები კომერციულ ბანკებსაც არ შექმნიათ", - აღნიშნა ფინანსთა მინისტრმა.
ამასთან, ბაინდურაშვილის შეფასებით, ეკონომიკის ზრდას ხელი იმანაც შეუწყო, რომ ყველაფერი გააკეთა ხელისუფლებამ, რათა დეფიციტის უმართავი ზღვარი არ დაეშვა.
"სახელმწიფომ სტრატეგია სწორად განსაზღვრა და ამის კარგი მაგალითი ტურიზმია, რომლის საშუალებითაც ქვეყანაში ზაფხულიდან უცხოური ვალუტის შემოსვლა დაიწყო. ბათუმში ინვესტიციების განხორციელება და გზების მოწყობამ, რომელმაც ტურისტებს საშუალება მისცა საქართველოს მთა ენახა ეკონომიკას ამოსუნთქვის საშუალება მისცა, რომ სწრაფად ამოსულიყო კრიზისიდან", - აღნიშნა ფინანსთა მინისტრმა.