საქართველოსთვის საერთაშორისო სავალუტო ფონდისგან ფინასური დახმარების აუცილებლობა აღარ დგას.
ამის შესახებ საქართველოს ფინანსთა მინისტრმა კახა ბაინდურაშვილმა დღეს გამართულ პრესკონფერენციაზე განაცხადა, სადაც სამინისტროს 2010 წელს გაწეული სამუშაო შეაჯამა.
მინისტრის განმარტებით, საერთაშორისო სავალუტო ფონდი პროგრამის განხორციელება დასრულების ფაზაშია და ის 2011 წლის პირველ ნახევარში ოფიციალურად შეწყდება, თუმცა ამ ეტაპისთვის ჩამორიცხვები ფაქტიურად უკვე დამთავრებულია.
რაც შეეხება საერთაშორისო სავალუტო ფონდთან საქართველოს შემდგომ თანამშრომლობას ბაინდურაშვილი განმარტავს, რომ ამ კუთხით წინასწარი მოლაპარაკები უკვე მიმდინარეობს, თუმცა ქართული მხარეს და ფონდის ექსპერტებიც მიიჩნევენ, რომ ქვეყნა კრიზისიდან გამოსულია და ანალოგიური პროგრამით აქტიური ფინასური დახმარება აღარ ესაჭიროება.
"თავის დროზე ეს პროგრამა 2008 წლის აგვისტოს ბოლოს შემუშავდა და იმავე წლის მეოთხე კვარტალში გადამუშავდა, სადაც ძირითადი აქცენტი კეთდებოდა ომის შემდგომი პრობლემების დაძლევაზე და ანტიკრიზისულ ღონისძიებებზე. ამ ეტაპზე ჩვენც და სავალუტო ფონდის ექსპერტებიც მიიჩნევენ, რომ საქართველო ამ ეტაპიდან გამოსულია და შესაბამისად პროგრამის გაგრძელება აღარ სჭირდება", - აცხადებს კახა ბაინდურაშვილი.
მისივე თქმით, სავარაუდოდ სავალუტო ფონდის მხრიდან ტექნიკური დახმარება კვლავ გაგრძელდება და ასევე საქართველოსთვის ხელმისაწვდომი დარჩება ფინასური რესურსებით, თუ ქვეყნისთვის ამის საჭიროება დადგა.