საქართველოს სახელმწიფო ვალი 2011 წელს შიდა პროდუქტთან მიმართებაში კვლავ 46%-ან ნიშნულზე შენარჩუნდება.
ამის შესახებ საქართველოს ფინანსთა მინისტრმა კახა ბაინდურაშვილმა დღეს გამართულ პრესკონფერენციაზე განაცხადა, სადაც 2010 წელს სამინისტროს მუშაობა შეაჯამა.
"ჩვენი ერთ-ერთი ამოცანად სახელმწიფო ვალის მართვა რჩებოდა, რომელიც ასევე ფინანსთა სამინისტროს ფუნქციებს განეკუთვნება. მიუხედავად იმისა, რომ ამ მხრივ დიდი შემოდინებები უნდა დაგვეკონტრაქტებინა და ეკონომიკა აგვემუშავებინა მაინც მოვახერხეთ და ვალის სტაბილურობა შევინარჩუნეთ. უფრო მეტიც 2011 წლის ბიუჯეტის დაგეგმვის დროს ჩვენ სახელმწიფო ვალის ზრდა შეჩერდა. 2010 წელს ის შეადგენდა 46%-ს მთლიან შიდა პროდუქტთან მიმართებაში, მოვალ წელს ეს ანალოგიურ ნიშნულზე რჩება, ხოლო შემდეგ წლებში - 2012 წელს - 44%-მდე და 2013 წელს - 41%-მდე შემცირდება", - აღნიშნა მინისტრმა.
ამასთან, ბაინდურაშვილმა განმარტა, რომ თავისუფლების აქტის მიხედვით საზოგადოებისთვის შეთავაზებულია 60%-ანი ვალის ზღვარი შიდა პროდუქტთან მიმართებაში.
"ეს ციფრი ჰაერიდან მოსული არ არის. ეს გახლავთ უსაფრთხოების ზღვარი, რომელსაც საერთაშორისო მასშტაბით იზიარებენ ეკონომიკის ექსპერტები, მაგრამ ჩვენი ამოცანა არის სახელმწიფო ვალი შენარჩუნდეს 45%-ს ფარგლებში, რომ 15% ყოველთვის გვრჩებოდეს მანევრირების მონაკვეთად", - აღნიშნა მან.
შეგახსენებთ, რომ საქართველოს სახელმწიფო ვალი მიმდინარე წლის 30 ნოემბრის მდგომარეობით 3,872,145 ათასი დოლარს შეადგენს.