სვანეთში გასამგზავრებლად ბილეთის ფასი თვითღირებულებაზე ნაკლები იქნება. ამის შესახებ საქართველოს პრეზიდენტმა მიხეილ სააკაშვილმა დღეს მესტიაში გამართულ მთავრობის სხდომაზე განაცხადა.
"წელს სვანეთის აეროპორტში სუბსიდირებულ ფრენებს ვაპირებთ, რაც ნიშნავს იმას, რომ ბილეთი გაცილებით ნაკლები ეღირება, ვიდრე მისი თვითღირებულებაა. ეს შეგნებულად არის გაკეთებული, რომ ბევრმა ადამიანმა ნახოს ეს მხარე", - განმარტა პრეზიდენტმა.
მისი განმარტებით, მესტიაში აეროპორტის გახსნით სვანეთისთვის ტურისტულ რეგიონად გადაქცევისთვის პირველი სერიოზული და მნიშვნელოვანი ნაბიჯი გადაიდგა.
"პრაქტიკულად პირველი ნაბიჯი გადაიდგა და პირველი კონკრეტული შედეგები მივიღეთ ახალი ტურისტული ზონის - მსოფლიო მარგალიტის, სვანეთის გახსნის კუთხით. სვანეთი იყო დაკეტილი დანარჩენი მსოფლიოსთვის და დანარჩენი საქართველოსთვისაც. დარწმუნებული ვარ, ქართველების აბსოლუტური უმრავლესობა, 90-ზე %-ზე მეტი, აქ საერთოდ არაა ნამყოფი და ფიქრობს, რომ ის შორეული, მიუდგომელი, საინტერესო, მაგრამ ძნელად ასასვლელი ადგილია. სინამდვილეში ეს არის ძალიან დიდი ტურისტული პოტენციალის მქონე ქართული კურორტი. აქ არის რამდენიმე კრიტერიუმი, რომელიც ამ ადგილის უნიკალურობას განსაზღვრავს: რელიეფი, სილამაზე, კლიმატი - ძალიან მშრალი და ჯანსაღი, თოვლის ხანგრძლივობა, ცოტა ქარი, წარმოუდგენელი კულტურული მემკვიდრეობა, კულინარია და ძალიან კარგი ხალხი", - განმარტა ქვეყნის პირველმა პირმა, რომლის თქმითაც, სვანეთთან მისასვლელი გზების მშენებლობა მომავალ წელს დასრულდება.