საქართველოს პრემიერ-მინისტრი ნიკა გილაური მოქალაქეებისთვის ელექტროენერგიის ვაუჩერების გადაცემის ინიციატივით გამოვიდა.
ამის შესახებ ნიკა გილაურმა მესტიაში გამართულ მთავრობის სხდომაზე განაცხადა.
გილაურის თქმით, მთავრობამ ვაუჩერების გადაცემის რამდენიმე ვარიანტი განიხილა და საბოლოოდ, არჩევანი ელექტროენერგიაზე შეაჩერა.
"ელექტროენერგიის მიმწოდებელ კომპანიებთან მოლაპარაკებას წლის ბოლომდე დავასრულებთ. საუბარია იმაზე, რომ ყველა ოჯახი მიიღებს ელექტროენერგიის 20-20 ლარიან ვაუჩერს, რომელსაც ისინი მოხმარებული დენის საფასურის გადასახდელად გამოიყენებენ. ეს, რა თქმა უნდა, მთლიანად პრობლემას ვერ მოხსნის, მაგრამ გარკვეულწილად შევეხიდებით მოსახლეობას", - განაცხადა გილაურმა.
პრემიერ-მინისტრის გათვლებით, ეს პროგრამა მთავრობას დაახლოებით 20-დან 25 მილიონ ლარამდე დაუჯდება.
"20 ლარი - ეს არის ელექტროენერგიის დაახლოებით ერთი თვის საშუალო მოხმარება და თუ ეს ინიციაიტვა დამტკიცდება, მზად ვიქნებით თებერვალში ის უკვე განვახორციელოთ", - აღნიშნა გილაურმა.
