საქართველოში ელექტრონული კომერციის განვითარების ხელშეწყობის მიზნით საქართველოს ეკონომიკისა და მდგრადი განვითარების სამინისტროს კავშირგაბმულობის საინფორმაციო ტექნოლოგიებისა და ინოვაციების დეპარტამენტის ინიციატივით გაიმართა საჯარო მსჯელობა ქვეყანაში ელექტრონული კომერციის განვითარების პერსპექტივების და ამოცანების შესახებ.
"საერთაშორისო ინტერნეტ-მაღაზიებში მომხმარებლები წლის განმავლობაში დაახლოებით 260 მლრდ აშშ დოლარს ხარჯავენ. სამწუხაროდ, საქართველოში ინტერნეტ-კომერცია ჯერ კიდევ სუსტადაა განვითარებული, ამიტომ ვცდილობთ, მაქსიმალურად შევუწყოთ ხელი ელექტრონული სისტემის განვითარებას ყველა სფეროში.
დღევანდელ ღონისძიებაზე განვიხილავთ იმ ძირითად პრობლემებს, რომლებიც გარკვეულ წილად აფერხებს ელექტრონული კომერციის განვითარებას საქართველოში, ასევე განსაზღვრული იქნება კოორდინირებული ქმედებების ნუსხა (მათ შორის საკანონმდებლო დონეზე) ქვეყანაში ლოკალურ და გლობალურ ბაზარზე ორიენტირებული ელექტრონული კომერციის განვითარებისათვის'' - განაცხადა ირაკლი ქაშიბაძემ.
ეკონომიკისა და მდგრადი განვითარების სამინისტროში გამართულ შეხვედრაში სხვა სამინისტროების, სამთავრობო უწყებების, ბანკებისა და ინტერნეტ მაღაზიების წარმომადგენლები მონაწილეობდნენ.
