საქართველოს ეკონომიკისა და მდგრადი განვითარების სამინისტრო მესტიის ბავშვთა სახლის მეურვეობას იწყებს. როგორც ჯანდაცვის სამინისტროსთან შესაბამისი მოლაპარაკებისას გაირკვა, დღესდღეობით ყველაზე მეტად სწორედ ამ ბავშვთა სახლს უჭირს და შესაბამისად, ეკონომიკისა და მდგრადი განვითარების სამინისტროს პროექტიც ბავშვთა სახლის საჭიროებების მიხედვით რამდენიმე ეტაპად დაიყო.
პროექტის პირველ ეტაპზე, 22 დეკემბერს ეკონომიკისა და მდგრადი განვითარების მინისტრი, ვერა ქობალია მესტიის ბავშვთა სახლს პირადად ესტუმრა და გადასცა ნივთები, რომლებიც ბავშვთა სახლს ამჟამად ყველაზე მეტად სჭირდებოდა, კერძოდ: თბილი ტანსაცმელი (შეგროვებულია სამინისტროს თანამშრომელთა მიერ); ჭურჭელი, დენისა და გაზის გამათბობლები, გენერატორი, ჰიგიენური საშუალებები (სახელმწიფოს საკუთრებაში მიქცეული ქონება, გადმოგვცა სსიპ "მომსახურების სააგენტომ").
ბავშვთა სახლის აღსაზრდელებმა ასევე საჩუქრად მიიღეს ფეხსაცმელი, ტანსაცმელი, ფარდები, ნაძვის ხეები, სათამაშოები და სხვა ნივთები (სახელმწიფოს საკუთრებაში მიქცეული ქონება, გადმოგვცა სსიპ "მომსახურების სააგენტომ").
ბავშვთა სახლის დირექტორმა, თამარ ნაკანმა მინისტრს ბავშვთა სახლი და დამხმარე ნაგებობები დაათვალიერებინა და იქ არსებული მდგომარეობა გააცნო.
პროექტის შემდეგ ეტაპზე დაგეგმილია ბიბლიოთეკის შეგროვება, რადგან მესტიის ბავშვთა სახლს ბიბლიოთეკა დაეწვა და მეორე რიგის საჭიროებად სწორედ ეს საკითხი დგას. წიგნების შეგროვება მოხდება როგორც სამინისტროს ძალებით, ისე გამომცემლობებთან მოლაპარაკებების გზით.
"ეს არ იქნება ერთჯერადი აქცია, ჩვენი სამინისტრო მომავალშიც გააგრძელებს ბავშვთა სახლის დახმარებას სხვადასხვა მიმართულებით. პროექტის ფარგლებში ასევე იგეგმება რამდენიმე ღონისძიება, რომელთა მიზანია ბავშვთა სახლის აღსაზრდელთა კულტურულ-საზოგადოებრივ აქციებში მონაწილეობა" - განაცხადა ვერა ქობალიამ.
მესტიის ბავშვთა სახლში ამჟამად 26 აღსაზრდელია, რომელთა ასაკიც ექვსიდან 18 წლამდეა. პროექტის ფარგლებში ეკონომიკისა და მდგრადი განვითარების სამინისტროს ხელმძღვანელობა მესტიის ბავშვთა სახლის 18 წლის ასაკს მიღწეულ ბენეფიციარებს დასაქმების საკითხში მაქსიმალურ დახმარებას გაუწევს.