აშშ-ს კონგრესის წარმომადგენელთა პალატიდან ნიუ იორკელი რესპუბლიკელი კონგრესმენი, ჯორჯ სანტოსი გარიცხეს.
კენჭისყრას 311-მა კონგრესმენმა 114-ის წინააღმდეგ დაუჭირა მხარი.
34 წლის ჯორჯ სანტოსი მეექვსე ადამიანია კონგრესის ისტორიაში, რომელიც წარმომადგენელთა პალატიდან გააძევეს. სასჯელის ეს მკაცრი ფორმა იშვიათი მოვლენაა და ხმათა ორ-მესამედს საჭიროებს.
სანტოსის წინააღმდეგ წარდგენილი მოხსენების მიხედვით, მას პოლიტიკური კამპანიისას მიღებული შემოწირულობების პირადი მიზნებისთვის დახარჯვაში ადანაშაულებენ.
სანტოსი კონგრესში 2022 წლის ნოემბრის შუალედური არჩევნების შედეგად აირჩიეს.
არჩევის შემდეგ მალევე ამერიკულ მედიაში გავრცელდა ცნობები, რომ სანტოსმა ბიოგრაფიის ნაწილი გააყალბა. მას ედავებიან ტყუილს განათლებისა და სამუშაო გამოცდილების შესახებ.
ასევე პროკურატურის ცნობით, საარჩევნო კამპანიის დაფინანსებისთვის მიღებულ თანხებს ის პირადი მიზნებისთვის ხარჯავდა, მათ შორის ძვირადღირებულ ტანსაცმელზე.
მას ასევე ადანაშაულებენ ცხოველთა დამცველი ყალბი საქველმოქმედო ორგანიზაციის შექმნასა და მისი თანხების მითვისებაში.
სანტოსი მის წინააღმდეგ წარდგენილ 23-ვე ბრალში თავს უდანაშაულოდ ცნობს.
