აშშ-ის სახელმწიფო მდივანი ენტონი ბლინკენი, რომელიც დუბაიში იმყოფებოდა, გამგზავრებამდე აეროპორტში ჟურნალისტებს ესაუბრა და ცეცხლის შეწყვეტის შეთანხმების დარღვევაში „ჰამასი“ დაადანაშაულა.
„ჰამასმა დაარღვია აღებული ვალდებულებები, პაუზის დასრულებამდე მან განახორციელა სასტიკი ტერორისტული თავდასხმა იერუსალიმში და მოკლა სამი ადამიანი“, - თქვა ბლინკენმა ხუთშაბათს იერუსალიმის ავტობუსის გაჩერებაზე მომხდარ სროლასთან დაკავშირებით, რომელზეც პასუხისმგებლობა „ჰამასმა“ აიღო.
გარდა ამისა, ბლინკენმა თქვა, რომ დაჯგუფებამ არ შეასრულა დანარჩენი მძევლების გათავისუფლების ვალდებულება, თუმცა მისი თქმით, შეერთებული შტატები კვლავ ინტენსიურად მუშაობს ამ მიზნის მისაღწევად.
„ჩვენ მზად ვართ გავაკეთოთ ყველაფერი იმისათვის, რომ ყველა დაუბრუნდეს საყვარელ ადამიანებს, კერძოდ, ჩვენ ვაგრძელებთ პროცესს, რომელმაც შვიდი დღე იმუშავა“, - განაცხადა სახელმწიფო მდივანმა. მისივე თქმით, ამ მიმართულებით მუშაობა თითქმის ყოველ საათს გრძელდება.
ბლინკენმა კიდევ ერთხელ გაიმეორა ღაზის მშვიდობიანი მოსახლეობის დაცვის მკაფიო ზომების დაწესების აუცილებლობის შესახებ.