დღეს მესტიაში საქართველოს მთავრობის გასვლითი სხდომა პრეზიდენტი მიხეილ სააკაშვილი უხელმძღვანელებს.
როგორც "ჯი-ეიჩ-ენს" პრეზიდენტის ადმინისტრაციაში განუცხადეს, მთავრობის სხდომა 14:00 საათზე დაიწყება.
არსებული ინფორმაციით, სხდომაზე პრეზიდენტი მინისტრთა კაბინეტთან ერთად სვანეთში მიმდინარე ინფრასტრუქტურული პროექტებს განიხილავს.
სავარაუდოდ მიხეილ სააკაშვილი დღესვე მესტიის აეროპორტს და ტურისტულ სეზონსაც გახსნის.
როგორც ცნობილია, 15 დეკემბრიდან ტურიზმის ეროვნული სააგენტო, კერძო სექტორთან ერთად, სვანეთში დასვენების მსურველებს, სპეციალურ ტურისტულ პაკეტებს სთავზობს. ტურიზმის ეროვნული სააგენტოს ინფორმაციით, სტანდარტულ ტურისტულ პაკეტებთან ერთად, შემუშავდება ასევე "ვიიქენდ-ტურები" და "კორპორატიული პაკეტები".
უკვე ცნობილია, რომ მესტიის მიმართულებით ფრენებს კანადური ავიაკომპანია Kenn Borek Air-ი განახორციელებს, რომელიც ფრენების ოპერირებას თავადვე გააკეთებს. აღსანიშნვია, რომ ავიაკომპანიაა, ძირითადად, აფრიკულ ზოლში დაფრინავს. თბილისი-მესტია-თბილისის მიმართულეით ავიაბილეთების ფასი 150 ლარიდან დაიწყება.
პირველი ეტაპისათვის ფრენები პარასკევსა და კვირაობით განხორციელდება და მზარდი მოთხოვნის პირობებში ავიარეისები კვირის სხვა დღეებშიც დაინიშნება. რელიეფის თავისებურებების გამო ფრენები ძირითადად დღისით განხორციელდება და დღის განმავლობაში შესაძლბელი გახდება სამი რეისის შესრულება.
თბილისი-მესტიის ავიარეისს მხოლოდ ერთი სპეციალიზირებული თვითმფრინავი მოემსახურება, რომლის ბორტზეც 19 ადამიანი ეტევა. ფრენის ხანგრძლივობა 1 საათს შეადგენს
ტურიზმის ეროვნულ სააგენტოში აცხადებენ, რომ ავიაბილეთების ფასი საკმაოდ დაბალია, რადგანაც მიკროავტობუსით ერთი გზა სვანეთის მიმართულებით 40 ლარი ღირს.
ტურიზმის ეროვნული სააგენტოს ინფორმაციით, მესტიაში 3 სასტუმრო, 49 "გესტჰაუსია", რომლებშიც 429 საწოლია.
რაც შეეხება უშგულს. იქ 9 "გესტჰაუსი" ფუნქციონირებს, რომლებიც 71 ადგილზეა გათვლილი. მესტიაში მოქმედებს სასტუმროებთან არსებული 3 რესტორანი.
სტატისტიკური მონაცემებით, 2010 წლის 9 თვეში მესტიაში 11 ათას 493 ტურისტმა დაისვენა.
უცხოელ ვიზიტორებს შორის სვანეთში დასვენებით წელს ისრაელიდან ჩამოსული ტურისტები გამოირჩეოდენ, რომელთა რაოდენობამ ტურისტების 51 %-ი შეადგინა.
სვანეთი მიმზიდველი აღმოჩნდა ასევე პოლონელი (13%) და გერმანელი (11%) ტურისტებისთვის.
სტატისტუკური მონაცემების თანახმად, სვანეთში წელს ჩეხეთიდან (6%), საფრანგეთიდან (4%), იტალიიდან (2%), აშშ-დან (2%), უკრაინიდან (2%), დიდი ბრიტანეთიდან (2%), თურქეთიდან (1%), ფინეთიდან (1%), კანადიდან (1%), შვეიცარიიდან (1%), სლოვაკეთიდან (1%), ჰოლანდიიდან (1%), ესპანეთიდან (1%) და ავსტრიიდან (1%) ჩამოსულმა ტურისტებმაც დაისვენეს.
მესტიაში აეროპორტის მშენებლობა უკვე დასრულდა, რომელიც თვითმფრინავების მიღებას დროის ნებისმიერ მონაკვეთში შეძლებს.
ზამთრის პერიოდში მესტიის აეროპორტი 18 ადამიანის ტევადობის თვითმფრინავების მიღებას შეძლებს, ხოლო ზაფხულის პერიოდში აეროპორტს 50 ადამიანის ტევადობის თვითმფრინავის მიღება შეეძლება.
მესტიის აეროპორტი ზღვის დონიდან 1400 მეტრ სიმაღლეზე მდებარეობს, მშენებლობის პროექტზე რამდენიმე ქართული კომპანია მუშაობს და დასაქმებულია 300-მდე ადამიანი.
