ამერიკის შეერთებული შტატების ყოფილი სახელმწფო მდივანი, ნობელიის მშვიდობის პრემიის ლაურეატი ჰენრი კისინჯერი 100 წლის ასაკში გარდაიცვალა.
ჰენრი კისინჯერი გერმანიაში დაიბადა, ებრაელთა ოჯახში, რომელიც 1930-იანი წლების ბოლოს ნაცისტების დევნას აშშ-ში გაექცა. 1950 წელს ჰენრი კისინჯერმა ჰარვარდის კოლეჯი დაამთავრა. მანამდე აშშ-ის არმიაში მსახურობდა.
1960-იანი წლების ბოლოდან კისინჯერი იყო აშშ-ის პრეზიდენტების, რიჩარდ ნიქსონის და ჯერალდ ფორდის მრჩეველი ეროვნული უსაფრთხოების საკითხებში, ხოლო 1973-1977 წლებში სახელმწიფო მდივანი.
ცივი ომის პერიოდში, რიჩარდ ნიქსონისა და ჯერალდ ფორდის ადმინისტრაციებში, კისინჯერი მნიშვნელოვანი ფიგურა იყო ჩინეთთან ურთიერთობის აღდგენისა და ვიეტნამის ომში გადაწყვეტილებების მიღების პროცესებში. ამასთანავე, მან დიდი წვლილი შეიტანა აშშ-სა და საბჭოთა კავშირს შორის დაძაბულობის განტვირთვაში.
1973 წელს, ვიეტნამში სამშვიდობო შეთანხმების მოლაპარაკებებში შეტანილი წვლილისთვის, მას მშვიდობის დარგში ნობელის პრემია გადაეცა.