თურქეთი მზად არის აიღოს მისია, როგორც ღაზას სექტორის გარანტორმა ქვეყანამ, თუ ასეთი სიტუაცია შეიქმნა. ამის შესახებ თურქეთის პრეზიდენტმა რეჯეფ თაიფ ერდოღანმა ყაზახეთიდან დაბრუნების შემდეგ თვითმფრინავში მყოფი ჟურნალისტების შეკითხვების საპასუხოდ განაცხადა.
მისი თქმით, ანკარა დიდ მნიშვნელობას ანიჭებს ერ რიადში ისლამური თანამშრომლობის ორგანიზაციის სამიტს, რომელიც ნოემბერშია დაგეგმილი, ისრაელ-პალესტინის კონფლიქტის ზონაში ცეცხლის შეწყვეტის კუთხით.
„თურქეთის მთელი ძალისხმევა მიმართულია მშვიდობისკენ ღაზას სექტორსა და პალესტინაში, სადაც ხალხი აღარ უნდა იღუპებოდეს და სახლების დატოვება აღარ უნდა უწევდეთ“, - ხაზგასმით აღნიშნა ერდოღანმა.
მისი თქმით, თურქეთმა უნდა აიღოს წამყვანი როლი ღაზაში, როგორც გარანტორმა ქვეყანამ.
საბერძნეთი შეიძლება იყოს გარანტორი ქვეყანა კვიპროსში, დიდი ბრიტანეთიც შეიძლება იყოს გარანტორი და რატომ არა თურქეთი, რატომ არ შეიძლება შეიქმნას მსგავსი სტრუქტურა ღაზაში?“ - აღნიშნა ერდოღანმა.
ისრაელის პრემიერ-მინისტრ ბენიამინ ნეთანიაჰუზე საუბრისას ერდოღანმა თქვა, რომ ის აღარ არის ადამიანი, ვისთანაც თურქეთს შეუძლია ლაპარაკი.
„ღაზას სექტორზე თავდასხმებზე პასუხისმგებლობა, უპირველესად, თავად ისრაელის პრემიერ-მინისტრ ნეთანიაჰუს ეკისრება. ისრაელის პრემიერ-მინისტრის წინააღმდეგ საუბრები უკვე მიმდინარეობს ისრაელშიც“, - აღნიშნა ერდოღანმა.
თურქეთის პრეზიდენტის თქმით, ნეთანიაჰუმ მოქალაქეების მხარდაჭერა დაკარგა და ახლა მის დაბრუნებას რელიგიური ტერმინების გამოყენებით ცდილობს.
„რაც თქვენ გააკეთეთ, არაფერ შუაშია ბიბლიასთან და თორასთან. ამას არც ბიბლია, არც თორა და არც ფსალმუნები არ აღიარებს“, - თქვა ერდოღანმა ნეთანიაჰუს მისამართით.
გარდა ამისა, თურქეთის ლიდერმა თქვა, რომ ანკარა მხარს დაუჭერს ინიციატივებს, რომლებიც შექმნის შესაძლებლობას ისრაელის ომის დანაშაულების საქმეები გადაეცეს სისხლის სამართლის საერთაშორისო სასამართლოს.
