სასჯელაღსრულების, პრობაციისა და იურიდიული დახმარების სამინისტროს სახალხო დამცველი პატიმრების გასეირნების დროის გახანგძლივების რეკომენდაციას აძლევს.
ამის შესახებ საუბარია დასკვნაში, რომელიც სახალხო დამცველის სპეციალურმა პრევენციულმა ჯგუფმა იმერეთის რეგიონის სასჯელაღსრულების დაწესებულების მონიტორინგის შემდეგ განახორციელა.
მონიტორინგის მსვლელობისას სპეციალური პრევენციული ჯგუფის წევრები გაესაუბრნენ პატიმრებს, დაწესებულებების თანამშრომლებს და სამედიცინო პერსონალს. ძირითადი აქცენტი გაკეთდა პატიმრებთან მოპყრობაზე.
მსჯავრდებულები სახალხო დამცველის წარმომადგენლებთან გასაუბრებისას აღნიშნავენ, რომ წინა წლებთან შედარებით მდგომარეობა მათთან მოპყრობის მხრივ საგრძნობლად გაუმჯობესდა.
გეგუთის #14 დაწესებულებაში მონიტორინგის დროს განთავსებული იყო 2678 მსჯავრდებული. პატიმრებთან გასაუბრებით გაირკვა, რომ თანამშრომლები მათ აღარ ექცევიან გამომწვევად და დამამცირებლად, აღარ ხდება მსჯავრდებულთა უმიზეზოდ დასჯა. მონიტორინგის დროს არცერთი მსჯავრდებული არ იყო განთავსებული სამარტოო საკნებში (კარცერებში).
მსჯავრდებულებმა გამოთქვეს სურვილი, რომ დაწესებულების იმ ნაწილში, სადაც განლაგებულია ე.წ. ბარაკები და სადაც მსჯავრდებულთა უმეტესი ნაწილია განთავსებული, აშენდეს სტადიონი.
დაწესებულებაში ასევე ხდება ტელე-რადიო ტრანსლაცია.
მსჯავრდებულებს შესაძლებლობა აქვთ, დაწესებულების მაღაზიაში შეიძინონ ჟურნალები, კროსვორდები და გაზეთები. ამანათით დაშვებულია: მინერალური წყლის, ვაშლის, კივის, მსხლის, ბანანის, წიგნების, დომინოს, ჭადრაკის, მკვნეტელას, ტანსაცმლის და თეთრეულის შეგზავნა.
"კვების რეჟიმის გამო მსჯავრდებულებს სუფთა ჰაერზე დღის განმავლობაში დაახლოებით 4 საათი უწევთ ყოფნა. სახალხო დამცველმა არაერთხელ გასცა აღნიშნული შეზღუდვის გამოსწორების რეკომენდაცია, რათა პატიმრებს მიეცეთ საშუალება, მეტი დრო გაატარონ სუფთა ჰაერზე", - ნათქვამია დასკვნაში.
გეგუთის დაწესებულების ყველა საცხოვრებელ ბარაკში დაიგო იატაკის ახალი საფარი და ერთ-ერთ კორპუსში გარემონტდა საპირფარეშოები.
გეგუთის დაწესებულების მაღაზიაში ერთი სექცია გამოიყო მედიკამენტებისთვის. მონიტორინგის დროს აღნიშნულ სექციაში შესაძლებელი იყო 50-მდე დასახელების მედიკამენტის შეძენა.