ქართული ოცნების წევრმა, ალუდა ღუდუშაურმა პარლამენტის ოპოზიციონერი დეპუტატი, ტარიელ ნაკაიძეს მატყუარა და არაკაცი უწოდა. ამის შესახებ მან პარლამენტის პლენარულ სხდომაზე განაცხადა, სადაც სახალხო დამცველის ანგარიშის მოსმენა მიმდინარეობდა.
"აქ ჩვენ შემაშფოთებელი კონტურები მოვისმინეთ იმ პირისგან, ვინც თავს დებს, რომ იმ კონფესიას მიეკუთვნება, რომელიც წესითა და რიგით, სიყვარულსა და შემწყნარებლობაზე ქადაგებს. მაგრამ, ზოგადად, ეს პიროვნება ვერ ჩამოყალიბდა, როგორც ადამიანად. ეს პირი იყო და დღემდე არის ადამიანის უფლებათა კომიტეტის წევრი. მას თითი თითზე არ აქვს დადებული და ვერ ბედავს, შემოვიდეს და საკუთარი აზრი დააფიქსიროს, იმიტომ, რომ მატყუარაა. ის შუღლის გაღვივებას ცდილობს. რაზე ვლაპარაკობთ, წარმოიდგინეთ, რომ ადამიანი საუბრობდეს ჰუმანურობაზე, სიყვარულზე, ხალხს შორის ძმურ ურთიერთობაზე და - პირდაპირ შუღლზე საუბრობს. საზოგადოებას ბოდიშს ვუხდი, მაგრამ ამ მაღალი ტრიბუნიდან პირდაპირ გეუბნებით, რომ ტარიელ ნაკაიძე არის მატყუარა, არაკაცი. ის იმის თვალსაჩინო ნიმუშია, როგორი არ უნდა იყოს ადამიანი და კაცი. ის არის არაკაცი. ნაკაიძე იმდენად პატარა კაცია, რომ ეთნიკურ ნიადაგზე შუღლის გაღვივებას ვერ შეძლებს,"- თქვა ალუდა ღუდუშაურმა.
ტარიელ ნაკაიძემ პარლამენტის სხდომათა დარბაზში, სახალხო დამცველის ანგარიშის წარდგენისას სიტყვით გამოსვლისას, რელიგიური უმცირესობების უფლებების დაცვის მნიშვნელობაზე და ამ კონტექსტში, თავდაცვის კოდექსზე ისაუბრა და აღნიშნა, რომ მიდგომა დისკრიმინაციულია - „ამ კანონში არის დისკრიმინაციული მიდგომა და დისკრიმინაცია“, - თქვა ნაკაიძემ და ომბუდსმენს რეაგირებისკენ მოუწოდა.
