აფხაზეთის მთავრობის თავმჯდომარე გიორგი ბარამია ბიჭვინთისა და ცხუმ-აფხაზეთის ეპარქიის სრულიად საქართველოს კათალიკოს-პატრიარქის, უწმინდესისა და უნეტარეს ილია მეორისადმი დაქვემდებარების თაობაზე წმინდა სინოდის გადაწყვეტილებას მიესალმება.
როგორც ბარამია აღნიშნულ საკითხზე კომენტირებისას აცხადებს, წმინდა სინოდის ეს გადაწყვეტილება, როგორც ოკუპირებული აფხაზეთის ტერიტორიაზე სასოწარკვეთილებასა და სულიერი გაუცხოების პირობებში მცხოვრები მრევლისათვის, ასევე დევნილობაში მყოფი უამრავი ადამიანისათვის იმედის მიმცემი და მანუგეშებელია.
"მისი უწმინდესობის ტიტულატურაში, ბიჭვინთისა და ცხუმ-აფხაზეთის მიტროპოლიტად მოხსენიება აბსოლუტური ჭეშმარიტებაა, რამეთუ საქართველოს ტერიტორიული მთლიანობა და სამოციქულო ეკლესიის ერთიანობა ქართული სახელმწიფოებრიობის განუყოფელი ნაწილია, რაც საერთაშორისო სამართლებრივი ნორმებითა და საეკლესიო კანონმდებლობითაა გამყარებული. დარწმუნებული ვარ, რომ აფხაზეთიდან დაწყებული მისი ღვთისნიერი გზა, კვლავ აფხაზეთში, ქართველთა და აფხაზთა შერიგებით დაგვირგვინდება", - აცხადებს ბარამია.
