თეთრმა სახლმა დაადასტურა, რომ იორდანიაში ოთხმხრივ სამიტზე პრეზიდენტ ჯო ბაიდენის ვიზიტი გაუქმდა, რომელიც ახლო აღმოსავლეთში ვიზიტის ფარგლებში იყო დაგეგმილი.
რამდენიმე ხნის წინ, ალ აჰლის საავადმყოფოზე თავდასხმის შემდეგ სამიტის გაუქმების შესახებ იორდანიის საგარეო საქმეთა მინისტრმა განაცხადა.
როგორც საერთაშორისო მედია იტყობინება, თეთრი სახლის განცხადებაში ნათქვამია, რომ იორდანიაში ვიზიტი გაუქმდა მეფე აბდულა II-სთან კონსულტაციების შემდეგ და „პალესტინის ხელისუფლების პრეზიდენტის, მაჰმუდ აბასის მიერ გამოცხადებული გლოვის ფონზე“.
იორდანიაში სამიტი უნდა გამართულიყო მეფე აბდულას, ბაიდენის, ეგვიპტის პრეზიდენტის აბდელ ფათაჰ სისის და პალესტინის ხელისუფლების ხელმძღვანელის მაჰმუდ აბასის მონაწილეობით.
თეთრი სახლის განცხადებაში აღნიშნულია, რომ აშშ-ის პრეზიდენტმა ღრმა მწუხარება გამოთქვა ღაზას სექტორში საავადმყოფოში აფეთქების შედეგად უდანაშაულო მსხვერპლის გამო და დაშავებულებსმალე გამოჯანმრთელება უსურვა.
აშშ-ის პრეზიდენტის ადმინისტრაციამ, აღნიშნა, რომ ბაიდენს უახლოეს მომავალში არაბული ქვეყნების ლიდერებთან პირადი კონსულტაციების იმედი აქვს. ის ასევე გეგმავს მომდევნო დღეებში გააგრძელოს რეგულარული და პირდაპირი კონტაქტი თითოეულ მათგანთან.
