საპარლამენტო უმრავლესობის წევრის, არჩილ თალაკვაძის განცხადებით, რადიკალური ოპოზიცია ხელისუფლებაში ყოფნის დროსაც და ახლაც რუსულ ინტერესებს ატარებს.
ის პარლამენტის სხდომაზე გამოეხმაურა ოპოზიციის განცხადებებს, რომ „შეკრებებისა და მანიფესტაციების შესახებ“ კანონპროექტი რუსულ ინტერესებს ემსახურება.
„ადამიანის უფლებების სფეროში რასაც თქვენ აკეთებდით, ძირი რომ გამოუთხარეთ, ადამიანის უფლებათა კონვენცია რომ საზოგადოებას თავზე გადაახიეთ, ეს იყო რუსული საქმე და თქვენ აკეთებდით ამ რუსულ საქმეს. ენერგოობიექტები რუსულ კომპანიებს რომ მიჰყიდეთ და საქართველოს ენერგოდამოუკიდებლობა მთლიანად რუსულ კომპანიებს გადაეცით, ეს იყო რუსული საქმე. ჩვენ ინვესტიციები გავაკეთეთ ელექტროგენერაციაში, ინვესტიციები გავაკეთეთ გაზის და თბოელექტროსადგურებში და საქართველოს დღეს აქვს მეტი გენერაცია, ვიდრე ჰქონდა. ეს არის ქართული და ეს არის ევროპული საქმე. თქვენ, როგორც მედიას მართავდით, მთლიანად რომ წაართვით საუბრის უფლება, ჟურნალისტები რომ პოლიტიკურ ინსტრუმენტებად გადააქციეთ და თქვენი პოლიტიკური გუნდის წევრი რომ იყო მთავარი პროდუსერი, ეს იყო რუსული საქმე. დღეს, როცა ქვეყანაში უკვე ოცი მედია არის, მათ შორის თქვენ რამდენიც გეკუთვნით, ეგეც დათვლილი გექნებათ, ეს არის თავისუფალი და მრავალფეროვანი მედია. თქვენ როგორც ექცეოდით ბიზნესს, ღამღამობით რომ იბარებდით და ქონებებს აჩუქებინებდით სახელმწიფოზე, ეს არის რუსული საქმე. დღეს, როცა ბიზნესი თავისუფალია, ეს არის ქართული და ევროპული საქმე. შემიძლია, გავაგრძელო ჩამონათვალი, მაგრამ, მგონი, ძალიან კარგად ხვდებით, რომ რუსულ საქმეს სწორედ თქვენ აკეთებდით, როდესაც საკუთარ ქვეყანას პანდემიის ურთულეს პერიოდში ბოიკოტი გამოუცხადეთ და პარლამენტში 8 თვის განმავლობაში არ შემოდიოდით. აბა, დაფიქრდით, ვის გაახარებდა ყველაზე მეტად საქართველოს პარლამენტის, მთავარი პოლიტიკური ორგანოს ბლოკირება? ვის, თუ არა საქართველოს მტრებს. სწორედ მათ ინტერესებს ემსახურებოდით თქვენ და, საერთოდ, რა რუსულ საქმეზე გველაპარაკებით? თქვენი ბანაკის ლიდერები ხელფასებს იღებენ პირდაპირ რუსეთის ბიუჯეტიდან, რაზეც საერთოდ ხმა არ ამოგიღიათ, არანაირი კომენტარი თქვენგან არ მოგვისმენია. საერთოდ როგორ ბედავთ, რომ „ქართულ ოცნებაში“ ვინმეს მიმართ იშვერთ ხელს. საგარეო საქმეთა მინისტრი არ გყავდათ რუსეთის მოქალაქე? აქ, თქვენი ოპოზიციური ბანაკის ერთ-ერთი ლიდერი დღემდე არ არის რუსეთის მოქალაქე? ვისზე ლაპარაკობთ, თქვე მართლა პრორუსულებო და რუსული ინტერესების გამტარებლებო?! რადიკალური ოპოზიცია დღემდე პირდაპირ რუსეთის ინტერესების გამტარებლები ხართ. ხელისუფლებაში როცა იყავით, მაგას აკეთებდით და ოპოზიციაშიც მაგას აკეთებთ“, – განაცხადა არჩილ თალაკვაძემ.
