რუმინეთის თავდაცვის სამინისტროს ინფორმაციით, გასულ ღამეს რუსულმა დრონებმა, სავარაუდოდ, მისი საჰაერო სივრცე დაარღვიეს.
რუსეთის ძალებმა დრონებით მორიგი შეტევა განახორციელა უკრაინის წინააღმდეგ. უკრაინელი სამხედროების ცნობით, რუსებმა 40 დრონი გაუშვეს, მათგან 30 უკრაინის თავდაცვის ძალებმა გაანადგურეს. რუსებმა იერიში მიიტანეს რუმინეთის მოსაზღვრე ოდესის ოლქზეც, სადაც მარცვლეულის საცავის პორტები მდებარეობს.
რუმინეთის თავდაცვის უწყების განცხადებით, უკრაინის მოსაზღვრე ტულჩისა და გალაცის მუნიციპალიტეტების მოსახლეობა შესაძლო საფრთხის შესახებ გააფრთხილეს.
რუმინეთის თავდაცვის სამინისტროს ცნობით, სათვალთვალო სარადარო სისტემამ აჩვენა საჰაერო სივრცის შესაძლო დარღვევა - დაფიქსირდა სიგნალი გალაცის მუნიციპალიტეტის მიმართულებით.
უწყებაში აღნიშნავენ, რომ ჯერ არ გააჩნიათ მონაცემები, რომ რუმინეთის ტერიტორიაზე რაიმე ობიექტი ჩამოვარდა, თუმცა შაბათს ნამსხვრევების ძებნა გაგრძელდება.
სექტემბერში რუმინეთის ხელისუფლებამ გაავრცელა ინფორმაცია, რომ რუსული თვითმფრინავების ნამსხვრევები, სავარაუდოდ, უკრაინის მოსაზღვრე რაიონებში იპოვეს.
ეს მოხდა რუსეთის მორიგი თავდასხმის შემდეგ უკრაინის პორტის ინფრასტრუქტურაზე.
რუმინეთის თავდაცვის სამინისტრომ უკრაინის მოსაზღვრე რაიონებში ბომბსაფარები ააშენა და ადგილობრივ მცხოვრებლებს სათანადო რეკომენდაციები მისცა რუსული დრონებით თვდასხმის შემთხვევაში თავშესაფრებით სარგებლობასთან დაკავშირებით.
