ქვეყნის გარეთ რომ გავიდა პრეზიდენტი, შედეგი რა იყო? რომელიმემ თქვა საქართველო იმსახურებს კანდიდატის სტატუსს და მხარს დავუჭერთო?! - ამის შესახებ ფრაქცია "ქართული ოცნების" თავმჯდომარემ, მამუკა მდინარაძემ "ღამის კურიერის" ეთერში განაცხადა.
მისი თქმით, დარღვევაა, როდესაც სალომე ზურაბიშვილი, რომლის კომპეტენციის ფარგლებშიც საგარეო ურთიერთობები არ შედის, მიდის, რომ წარმოადგინოს საქართველო მის ფარგლებს გარეთ.
"კონსტიტუციის დარღვევა პრეზიდენტის მხრიდან, ფორმალური და სამართლებრივი თვალსაზრისით სახეზეა და ვერავინ დაობს ამაზე. ოპოზიცია უბრალოდ გადადის მორალურ მხარეზე, სადაც უნდათ რომ საზოგადოება შეცდომაში შეიყვანენ, მაგრამ ვერ მოხდება ასე, რადგანაც როდესაც საქართველოს პრეზიდენტი, რომლის კომპეტენციის ფარგლებშიც საგარეო ურთიერთობები არ შედის და მიდის, რომ წარმოადგინოს საქართველო მის ფარგლებს გარეთ - ეს არის დარღვევა, თუკი ამას თან არ ახლავს მთავრობის თანხმობა. ცალსახაა ეს და კონსტიტუციაში წერია იმგვარად, რომ ინტერპრეტაციის საშუალებას არ იძლევა. ქვეყნის გარეთ რომ გავიდა პრეზიდენტი, შედეგი რა იყო? წავიდა პრეზიდენტი შეხვდა ლატვიის მხარეს, ამის შემდეგ გამოვიდა ლატვიის პრეზიდენტი და მიგვითითა, რომ შევუერთდეთ სანქციებს. სალომე ზურაბიშვილის შეხვედრის შემდეგ, რომელიმემ თქვა საქართველო იმსახურებს კანდიდატის სტატუსს და ჩვენ მხარს დავუჭერთო?! პირიქით, გზავნილები მოვისმინეთ, რომ მიუერთდით, დააწესეთ სანქციებიო, ეს იყო მისი შეხვედრების შედეგი,"- განაცხადა მამუკა მდინარაძემ.
