ევროპული საქართველოსა და თავისუფლების ინსტიტუტის წევრებმა 27 სექტემბერს დაგეგმილი ღონისძიების დამაანონსებელი პლაკატები გააკრეს და საზოგადოებას პარლამენტთან მოსვლისკენ მოუწოდეს.
როგორც ევროპული საქართველოს წევრმა, თენგო კირთაძემ აღნიშნა, ევროპულმა საქართველომ და თავისუფლების ინსტიტუტმა გადაწყვიტეს, რომ სოხუმის დაცემის დღეს გაემართათ ღონისძიება, რათა ამ კონფლიქტის მთავარი დამკვეთის, მონაწილისა და შემსრულებლის, რუსეთის როლი გამოკვეთონ.
მისი თქმით, ამ გზითაა შესაძლებელი წვლილის შეტანა ამ ტრაგედიის სწორად შეფასებაში, რაც საზოგადოებაში რეალურად 30 წლის განმავლობაში არ მომხდარა.
„ჩვენ გვაქვს სურვილი, საზოგადოების შიგნით მოხდეს კონსოლიდაცია იმ აზრის შესახებ, რომ რუსეთმა აფხაზეთში გენოციდი ჩაიდინა. ეს არის იყო დომინანტური ეთნოკონფლიქტი და რუსეთი არ გვჭირდებოდა შემდგომ პროცესებში, როგორც მშვიდობისმყოფელი ორ ტომს შორის, რომელთაც ერთმანეთთან ურთიერთობა არ შეუძლია.
ამ თემას არამხოლოდ მორალური ასპექტი აქვს დევნილების, დაღუპულთა და მათი ჭირისუფლების მიმართ, არამედ სტრატეგიული უსაფრთხოების დანიშნულება აქვს, რომელიც სამწუხაროდ ჩვენს ქვეყანაში ანალიტიკურ წრეებშიც არ არის შესაბამისად გააზრებული. ამიტომ ხვალ, პარლამენტის წინ ჩვენ ვაჩვენებთ იმ მტკიცებულებებს, რომლებიც ამ ერთი წლის განმავლობაში შევაგროვეთ.
ეს მტკიცებულებები ნათლად ამტკიცებს რუსეთის საჯარისო ფორმირებების მონაწილეობას, რაც ადასტურებს იმ ბრძანებების ჯაჭვს, რომელიც გამოიცემოდა მაშინდელ კონფლიქტში. საზოგადოებას წესით არ უნდა დარჩეს კითხვები რუსეთის შემდგომ როლთან დაკავშირებით. ეს თემა ჩვენი ქვეყნისთვის სამ ყველაზე ფუნდამენტურ თემას შორისაა, ეს არ არის ვიწროპარტიული ინტერების საკითხი, ეს ეროვნული ინტერესების თემაა და ამიტომ გვჭირდება ქვეყნის შიგნით კონსოლიდაცია“ - თქვა თენგო კირთაძემ
როგორც თავისუფლების ინსტიტუტის დირექტორმა, სალომე ხვადაგიანმა აღნიშნა, ხვალ პარლამენტის წინ დაგეგმილი ღონისძიების ფარგლებში გენოციდის მტკიცებულებები იქნება წარმოდგენილი.
მისივე თქმით, ასევე ნაჩვენები იქნებიან ის რუსი სამხედროები, რომლებიც უშუალოდ იყვნენ ჩართულნი გენოციდის ორგანიზებაში.
„დღეს, როდესაც უკრაინის შემთხვევამ მსოფლიო უფრო მკაცრი გახადა რუსეთის მიმართ, ჩვენც გვეხსნება შესაძლებლობების ფანჯარა, რომ მოვითხოვოთ ქართველთა გენოციდის აღიარება და დავიწყებულ მსხვერპლს ამგვარად ისტორიული სამართლიანობა აღვუდგინოთ“ - თქვა სალომე ხვადაგიანმა.
სოხუმის დაცემის დღეს, 27 სექტემბერს, 20:00 საათზე პარლამენტთან ევროპული საქართველო, თავისუფლების ინსტიტუტი და აფხაზთა კრება წარმოგიდგენთ ქართველთა გენოციდის მტკიცებულებებს და გენოციდში უშუალოდ მონაწილე რუს სამხედროებს.
