ლიეტუვის პრეზიდენტმა გიტანას ნაუსედამ, გავრცელებულ ინფორმაციაზე, რომ პოლონეთი წყვეტს იარაღის მიწოდებას უკრაინისთვის, განაცხადა, რომ ორ ქვეყანას შორის არსებული უთანხმოება რაც შეიძლება მალე უნდა მოგვარდეს. ამის შესახებ ნაუსედამ ორივე ქვეყნის ლიდერთან, ვოლოდიმირ ზელენსკისა და ანჯეი დუდასთან ნიუ-იორკში გაეროს გენერალური ასამბლეის სესიაზე შეხვედრისას თქვა.
„საერთო, ყველაზე მნიშვნელოვანი მიზნისთვის - რუსეთის აგრესიული ექსპანსიური პოლიტიკისგან ევროპის დაცვისთვის - უკრაინასა და პოლონეთს შორის არსებული უთანხმოება რაც შეიძლება სწრაფად უნდა მოგვარდეს. პოლონეთის როლი მხარდაჭერის უზრუნველყოფაში განსაკუთრებულია. გადაწყვეტილებები უნდა მოიძებნოს, რადგან კრიზისის შემდგომი გაღრმავება უპასუხისმგებლობა იქნება“, - განაცხადა ნაუსედამ.
გიტანას ნაუსედამ ხაზგასმით აღნიშნა, რომ საუბარია არა ცალკეული ქვეყნების, არამედ მთელი რეგიონის და თუნდაც კონტინენტის უსაფრთხოებაზე.
პოლონეთმა ოთხშაბათს განაცხადა, რომ უკრაინას არ მიაწვდის შეიარაღებას და ორიენტირებული იქნება საკუთარ თავდაცვით საჭიროებებზე.
„უკრაინა იცავს თავს რუსეთის სასტიკი თავდასხმისგან და მე მესმის ეს სიტუაცია, მაგრამ როგორც ვთქვი, ჩვენ დავიცავთ ჩვენს ქვეყანას. ჩვენ აღარ ვაძლევთ იარაღს უკრაინას, რადგან ახლა ვაიარაღებთ პოლონეთს“, - განაცხადა პოლონეთის პრემიერ-მინისტრმა მორავიეცკიმ.
კიევსა და ვარშავას შორის უთანხმოება უკრაინული მარცვლეულის ექსპორტის პრობლემას უკავშირდება. არჩევნების წინა დღეს პოლონეთმა გადაწყვიტა შეენარჩუნებინა ემბარგო უკრაინიდან სურსათის იმპორტზე - ეს აიხსნება პოლონელი ფერმერების დაცვის აუცილებლობით, რომელთა მხარდაჭერას ეყრდნობა დღევანდელი ხელისუფლება.
