თეთრი სახლი ჩრდილოეთ კორეას მოუწოდებს არ გადასცეს რუსეთს იარაღი.
შესაბამისი განცხადება აშშ-ის ეროვნული უსაფრთხოების საბჭოს სპიკერმა ედრიენ უოტსონმა გააკეთა.
მისი თქმით, როგორც აშშ ელოდებოდა, ჩრდილოეთ კორეის ლიდერი კიმ ჩენ ინი რუსეთში იარაღის მიწოდებასთან დაკავშირებთ მოლაპარაკებების გამართვის მიზნით მიემგზავრება.
გამოცემა Financial Times-ი წყაროზე დაყრდნობით წერდა, რომ ჩრდილოეთ კორეა მზად არის მოსკოვს გადასცეს საბრძოლო მასალა, ზალპური ცეცხლის რეაქტიული სისტემები და მცირე მანძილზე მოქმედი ბალისტიკური რაკეტები.
„ჩვენ მოვუწოდებთ ჩრდილოეთ კორეას დაიცვას საჯარო ვალდებულებები, რომელიც ფხენიანმა აიღო და არ მიაწოდოს და არ მიჰყიდოს რუსეთს იარაღი“, - განაცხადა უოტსონმა.
ვლადიმირ პუტინისა და კიმ ჩენ ინის შესაძლო მოლაპარაკების შესახებ ცოტა რამ არის ცნობილი. შეხვედრის შესახებ, რომელიც სავარაუდოდ, 12 სექტემბრისთვის არის დაგეგმილი, ამერიკული მედიისგან გახდა ცნობილი, რუსეთმა კი აღნიშნული ინფორმაცია მხოლოდ დღეს დაადასტურა.
