უკრაინის პრეზიდენტი ვოლოდიმირ ზელენსკი აცხადებს, რომ ემოციურად მზად არის ხანგრძლივი ომისთვის და აღნიშნავს, რომ ახლა რუსეთთან მოლაპარაკებისთვის „ცუდი მომენტია“. ამის შესახებ ზელენსკიმ The Economist-თან ინტერვიუში ისაუბრა.
„მე მზად უნდა ვიყო {ხანგრძლივი ომისთვის}, ჩემი გუნდი მზად უნდა იყოს ხანგრძლივი ომისთვის და ემოციურად მე მზად ვარ“, - აღნიშნა ზელენსკიმ.
ზელენსკის თქმით, ზოგიერთმა პარტნიორმა ბრძოლის ველზე უკრაინის სირთულეები, შესაძლოა საბაბად გამოიყენოს იმისთვის, რომ უკრაინას რუსეთთან მოლაპარაკებისკენ უბიძგოს, მაგრამ ახლა „ცუდი მომენტია, რადგან პუტინიც იგივეს ფიქრობს“, - განაცხადა ზელენსკიმ.
მან აღნიშნა, რომ რუსეთის პრეზიდენტი ვლადიმირ პუტინი ცდილობს გამოფიტოს უკრაინა, მაგრამ რუსეთი თავად არის მყიფე. „{პუტინს} არ ესმის, რომ ხანგრძლივ ომში ის წააგებს. არ აქვს მნიშვნელობა, რომ მას მხარს უჭერს 60 თუ 70 პროცენტი {რუსეთის მოქალაქეების}. არა, წააგებს მისი ეკონომიკა“, - განაცხადა ზელენსკიმ.
გამოცემა აღნიშნავს, რომ უკრაინის პრეზიდენტი კარგად აცნობიერებს რისკებს მისი ქვეყნისთვის, თუ დასავლეთი დაიწყებს დახმარების შეწყვეტას. რადგანაც ზოგიერთი დასავლელი მოკავშირე, მათ შორის აშშ მომავალ წელს არჩევნებს მართავს, ზელენსკი მიიჩნევს, რომ მხარდაჭერის შენარჩუნება რთული იქნება, განსაკუთრებით ფრონტზე მნიშვნელოვანი წარმატების არარსებობის გამო.
ამასთან, ზელენსკიმ აღნიშნა, რომ პუტინი ცდება, როდესაც იმედოვნებს, რომ აშშ-ში 2024 წლის არჩევნებში დონალდ ტრამპის მოგება მას გამარჯვებას მოუტანს, რადგან ტრაპმი მას მხარს არასდროს დაუჭერს. „ძლიერი ამერიკელები ასე არ იქცევიან“, - თქვა ზელენსკიმ.
ამასთან, ზელენსკიმ აღნიშნა, რომ ომში გამარჯვება არ მოვა „ხვალ ან ზეგ“, მაგრამ ეს არ არის ფანტასტიკური ოცნება. უკრაინის პრეზიდენტი ასევე კატეგორიულად გამორიცხავს პუტინთან კომპრომისებს. ომი გაგრძელდება „მანამდე, ვიდრე რუსეთი უკრაინის ტერიტორიაზე იქნება“, - ამბობს ზელენსკი. ის დარწმუნებულია, რომ მოლაპარაკების გზით მიღწეული შეთანხმება მუდმივი არ იქნება და რუსული მხარის მიერ დაირღვევა.
