პრეზიდენტი კონსტიტუციის 78-ე მუხლიდან გამომდინარე იმყოფება ევროკავშირის დედაქალაქებში და ამ დროს მისი იმპიჩმენტის პროცედურის დაწყება სხვა არაფერია, თუ არა ქვეყნის ეროვნული მომავლის საბოტაჟი, – ამის შესახებ ოპოზიციონერმა დეპუტატმა, თეონა აქუბარდიამ განაცხადა.
აქუბარდიას თქმით, იმპიჩმენტს მხარს არ დაუჭერს.
„არ მეგულება 100 დეპუტატი, რომელიც „ქართულ ოცნებას“ ამ პროცესში, ანტიდასავლურ კამპანიაში მიეხმარება. ჩემთვის გაუგებარია, რატომ ეთქვა პრეზიდენტს უარი ევროკავშირის დედაქალაქებში წასვლაზე იმ დროს, როდესაც ჩვენ პრეზიდენტის მხრიდან კანდიდატის სტატუსის მხარდამჭერი განცხადებები არაერთხელ მოგვისმენია. ამასთან, მისი ქმედებები და ნარატივი ყოველთვის ამ კურსის მხარდამჭერია. ვფიქრობ, რომ კონსტიტუციის დარღვევაა „ქართული ოცნების“ მხრიდან, როდესაც ისინი აინიცირებენ რუსულ კანონს, შემდეგ არ ასრულებენ რეკომენდაციებს და არ უშვებენ პრეზიდენტს ევროკავშირის დედაქალაქებში, რომ მან თავისი წვლილი შეიტანოს ქვეყნის ევროპული მომავლისთვის. ამ მოცემულობაში ეს განცხადებები არის მანიპულაცია“, – აღნიშნა თეონა აქუბარდიამ.
