გერმანიის საზოგადოებრივი მაუწყებელი ქართული ოცნების მიერ პრეზიდენტ სალომე ზურაბიშვილის წინააღმდეგ იმპიჩმენტის დაწყებასთან დაკავშირებით იუწყება, რომ ოპოზიციამ პრეზიდენტს პირობები წარუდგინა, რომლის მიხედვითაც იმპიჩმენტს არ შეუერთდება, თუ ის სააკაშვილს შეიწყალებს.
"ოპოზიციამ, თავის მხრივ, პირობა წაუყენა პრეზიდენტს, თუ ის პატიმრობაში მყოფ და აშკარად მძიმედ დაავადებულ ყოფილ პრეზიდენტს, მიხეილ სააკაშვილს შეიწყალებს, იმპიჩმენტს არ შეუერთდებიან" - ნათქვამია გერმანული მედიის სტატიაში.
1-ელ სექტემბერს ქართული ოცნების თავმჯდომარემ, ირაკლი კობახიძემ მმართველი პარტიის მიერ პრეზიდენტის წინააღმდეგ იმპიჩმენტის პროცედურის დაწყების შესახებ გადაწყვეტილება გამოაცხადა.
მმართველ გუნდს კენჭისყრაზე 100 ხმა დასჭირდება. "ქართულ ოცნებას" "ხალხის ძალასთან" ერთად პარლამენტში 84 ხმა აქვს.
ცნობილია, რომ "ევროპელი სოციალისტები", რომლებსაც პარლამენტში 4 დეპუტატი ჰყავთ, იმპიჩმენტს მხარს დაუჭერენ.
