30 აგვისტოს გერმანიის კოალიციურმა მთავრობამ შინაგან საქმეთა მინისტრის, ნენსი ფეიზერის შემოთავაზებული კანონპროექტი მიიღო, რომლის მიხედვითაც საქართველო და მოლდოვა უსაფრთხო ქვეყნებად დასახელდა. იუწყება Reuters
გასულ წელს გერმანიის მთავრობას თავშესაფრის მოთხოვნით 8 865-მა ქართველმა და 5 218-მა მოლდოველმა მიმართა. გერმანიის შსს-ს ცნობით, 2022 წელს და 2023 წლის პირველ ნახევარში ორივე ქვეყნიდან მიღებული აპლიკაციების 99.9% არ დააკმაყოფილეს.
მედიის ინფორმაციით, გერმანიამ უსაფრთხო ქვეყნის სტატუსი საქართველოს და მოლდოვას იმის საფუძველზე მიანიჭა, რომ არცერთ ქვეყანაში არ არსებობს სახელმწიფო დევნის შიში და სახელმწიფო თავის მოქალაქეებს იცავს. შოლცის მთავრობა მიმდინარე წელს ცდილობდა გაეადვილებინა გამოცდილი მიგრანტებისთვის გერმანიის მოქალაქეობის მიღება, რათა ქვეყანაში მუშახელის ქრონიკული დეფიციტი შემსუბუქებულიყო.
ლტოლვილთა უფლებების დამცველმა ორგანიზაციამ Pro Asyl-მა გერმანიის მთავრობის ნაბიჯი საქართველოსა და მოლდოვას მიმართ გააკრიტიკა. მათი შეფასებით, ეს გადაწყვეტილება უგულებელყოფს იმ ფაქტს, რომ რუსეთი ორივე ქვეყანაში სეპარატისტულ რეგიონებს იკავებს, რაც საფრთხეს უქმნის საქართველოს და მოლდოვას უსაფრთხოებას.
ორგანიზაციამ ასევე მოუწოდა საქართველოს ხელისუფლებას, რომ LGBTIQ+ უფლებების შეფერხებისა და პრესის თავისუფლების საკითხები კანონის უზენაესობის ფარგლებში იქნას განხილული.
