„ტერიტორიების გაცვლა? მზად ვართ, ბელგოროდი გავცვალოთ ნატო-ში ჩვენი წევრობის სანაცვლოდ“, – ამის შესახებ უკრაინის პრეზიდენტმა ვოლოდიმირ ზელენსკიმ განაცხადა.
უკრაინის პრეზიდენტი გამოეხმაურა ნატო-ს გენერალური მდივნის ოფისის დირექტორის, სტიან იენსენის განცხადებას, სადაც ის ამბობს, რომ უკრაინა შეიძლება, გახდეს ალიანსის წევრი რუსეთისთვის ტერიტორიის დათმობის სანაცვლოდ.
ამის შესახებ ზელენსკიმ დანიის პრემიერ-მინისტრ მეტე ფრედერიკსენთან ერთად გამართულ პრესკონფერენციაზე ისაუბრა.
დანიის პრემიერ-მინისტრმა აღნიშნა, უკრაინა თავად გადაწყვეტს, აწარმოოს თუ არა სამშვიდობო მოლაპარაკებები რუსეთთან.
შეგახსენებთ, ნატოს-ს გენერალური მდივნის ოფისის დირექტორმა სტიან იენსენმა განაცხადა, რომ უკრაინა შესაძლოა, გახდეს ნატო-ს წევრი თუ რუსეთს ტერიტორიებს დაუთმობს. „მიმაჩნია, რომ ერთ-ერთი გადაწყვეტილება, შესაძლოა, იყოს უკრაინის მიერ ტერიტორიებზე უარის თქმა და ამის სანაცვლოდ ნატო-ს წევრობის მიღება“, - განაცხადა მან.
