მოსკოვის მერის სერგეი სობიანინის ინფორმაციით, რუსეთის დედაქალაქზე უპილოტო საფრენი აპარატით შეტევა სცადეს. მისივე ცნობით, საჰაერო თავდაცვის საშუალებებმა ეს მცდელობა აღკვეთეს.
„ღამით, მოსკოვზე, სამხრეთის მიმართულებით, განხორციელდა თავდასხმის მცდელობა უპილოტო საფრენი აპარატებით. საჰაერო თვადცვის ძალებმა ეს თავდასხმა აღკვეთეს, მადლობა სამხედროებს გაწეული სამუშაოსათვის“, - განაცხადა სობიანინმა.
ინფორმაციაში დაზუსტებული არ არის კონკრეტულად სად ჩამოაგდეს უპილოტო საფრენი აპარატი.
მანამდე დრონებით თავდასხმის საფრთხის გამო რეისების მიღება შეწყვიტა მოსკოვის ვნუკოვოსა და დომოდედოვოს აეროპორტებმა.
გარდა ამისა, რამდენიმე საათის წინ უპილოტო საფრენი აპარატი დაეჯახა კურსკის სარკინიგზო სადგურს. დაშავდა რამდენიმე ადამიანი.
