ფინანსთა მინისტრ კახა ბაინდურაშვილის განცხადებით, საქართველოს ეკონომიკური კრიზისიდან გამოსვლაში ტურიზმის სექტორი დაეხმარა.
"წელს 35 %-ი გაიზარდა ქვეყანაში ტურისტების რაოდენობა. სწორედ ტურიზმია ის სექტორი, რომელიც ყველაზე მეტად დაგვეხმარა კრიზისიდან გამოსვლაში, ვინაიდან ამ სფეროს წყალობით მოხდა ძალზედ დიდი უცხოური ვალუტის შემოდინება ქვეყანაში", - განაცხადა ბაინდურაშვილმა დღეს, პარლამენტის პლენარულ სხდომაზე, 2011 წლის სახელმწიფო ბიუჯეტის პროექტის წარდგენისას.
მისივე განმარტებით, მომავალ წელსაც ტურისტული ინფრასტრუქტურის მშენებლობა მთავრობის ერთ-ერთი პრიორიტეტი იქნება, რა მიმართულებითაც 205 მლნ ლარია გათვალისწინებული.
"მომავალ წელს გაგრძელდება ბათუმის ტურისტული ინფრასტრუქტურის, მესტიის ტურისტული ინფრასტრუქტურისა და ანაკლია-განმუხურის ტურისტული ინფრასტრუქტურის მოწყობა, რაც ამ უკანაკსნელის შემთხვევაში, პირველ რიგში, ნაპირსამაგრი სამუშაოების მშენებლობას ითვალისწინებს", - განმარტა ბაუნდურაშვილმა.
ამასთან, ფინანსთა მინისტრის თქმით, დაგეგმილია ფოთი-ანაკლიის დამაკავშირებელი გზის მშენებლობაც, რომლის დაფინანსების საკითხზეც ევროპის საინვესტიციო ბანკსა და აზიის განვითარების ბანკთან მოლაპარაკებები მიმდინარეობს.