სააღსრულებლო ბიუროს ყოფილ შენობაში მცხოვრები, კოდორიდან დევნილი მოსახლეობა გამოსახლების შემდეგ საცხოვრებელი ფართების გარეშე არ რჩებიან. ამის შესახებ "ჯი-ეიჩ-ენს" ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროში განუცხადეს.
"მე-7 კლასელი ლიკა ჩხეტიანის დედა, რომელმაც დღევანდელ აქციაზე პრეზიდენტისადმი შემუშავებული მიმართვა წაიკითხა, დევნილი არ არის. თავად ბავშვი კი მამასთან - ზამირ ჩხეტიანთან ერთად ქუთაისში, ერთ-ერთYკომპაქტურ ჩასახლებაში (კოტეჯი ნომერი 1) არის ჩაწერილი, სადაც საცხოვრებელი ფართიც გააჩნიათ. ამ ოჯახის კიდევ ერთი წევრი, ბავშვის ბაბუა - კაპიტონ ჩხეტიანი მეუღლესთან ერთად თბილისში, გლდანში, მოსულიშვილის პირველ ნომერში, ასევე კომპაქტურ ჩასახლებაში (ყოფილ კარტოგრაფიის შენობაში) ცხოვრობს... რაც შეეხება მედეა გურჩიას, რომელიც ამტკიცებს, რომ სამინისტროსგან არაფერი მიუღია, მის მამამთილს და ოჯახის უფროსს, როგორც კოდორიდან დევნილს მიღებული აქვს 10 ათას დოლარიანი კომპენსაცია, ანუ ეს ოჯახი ერთხელ უკვე დაკმაყოფილებულია, შესაბამისად, მას სახელმწიფო კიდევ რამდეჯერმე ვერ დააკმაყოფილებს", - აცხადებენ სუბელიანის უწყების პრესსამსახურში.
ამასთან, სამინისტროში კიდევ ერთხელ განმარტავენ, რომ იმ დევნილებს, რომელთაც საცხოვრებელი ფართები არ გააჩნიათ, სახელმწიფო რეგიონებში რეაბილიტირებულ საცხოვრებელ ფართებს სთავაზობს.
შეგახსენებთ, რომ ვაჟა-ფშაველას მე-3 კვარტალის მე-8 ა კორპუსში მდებარე ყოფილი სააღსრულებო ბიუროს შენობაში მცხოვრები კოდორის ხეობიდან დევნილები მათ შესაძლო გამოსახლებას აპროტესტებენ და დახმარებისთვის პრეზიდენტს მიმართავენ.
დევნილები დღეს "კონსერვატიული პარტიის" წევრებმა ლაშა ჩხარტიშვილმა, კახა კუკავამ და "ხალხის პარტის" წარმომადგენელმა ალეკო შალამბერიძემ მოინახულეს
