საქართველოს პარლამენტის თავმჯდომარე დავით ბაქრაძე თბილისის №51-ე საჯარო სკოლას ეწვია და მეორე კლასის აღსაზრდელებს შეხვდა.
ბაქრაძემ პატარებს კითხვის და ზოგადად წიგნიერების მნიშვნელობაზე ესაუბრა. მათთან ერთად ჰანს კრისტიან ანდერსენის ზღაპრები წაიკითხა, რის შემდეგაც გაიმართა დისკუსია წაკითხული მასალის ირგვლივ.
პარლამენტის თავმჯდომარემ პატარებს საჩუქრად ჰანს კრისტიან ანდერსენის ზღაპრების წიგნები გადასცა.
"დღევანდელ ეპოქაში ძალიან მნიშვნელოვანია, რომ ბავშვებმა იცოდნენ კომპიუტერი, ინფორმაციას იღებდნენ ინტერნეტით, ტელევიზიით და სხვა მედიასაშუალებებით, მაგრამ არ შეიძლება დაიკარგოს წიგნიერების, წიგნის წაკითხვის კულტურა. სწორედ ამიტომ, დიდი სიამოვნებით დავთანხმდი განათლების სამინისტროს ამ ინიციატივას და შევეცდებით სიმბოლური აქციით კიდევ ერთხელ დავანახოთ ბავშვებს რამდენად მნიშვნელოვანია ნებისმიერ ეპოქაში ნაბეჭდი პროდუქცია", - განაცხადა დავით ბაქრაძემ ჟურნალისტებთან საუბრისას.
პროექტი "წიგნის მეგობარი" ინიცირებულია განათლებისა და მეცნიერების სამინისტროს მიერ. მისი მიზანია ბავშვებს განუვითაროს კითხვის, მოსმენისა და წაკითხულის გააზრების უნარები, ხელი შეუწყოს წიგნიერების და კითხვის პოპულარიაზციას.
პროექტში მონაწილეობენ სტუდენტები, მწერლები, პოლიტიკოსები, საზოგადოებისთვის ცნობილი ადამიანები და სხვა მოხალისეები.