ახალგორის, ერედვის, ქურთას და თიღვას თვითმმართველი ერთეულები სხვა თვითმმართველი ერთეულის ტერიტორიაზე კომპაქტურად განსახლებულ იძულებით გადაადგილებულ პირებს სოციალურ დახმარებას გაუწევენ.
შესაბამისი უფლებამოსილება მათ "ადგილობრივი თვითმმართველობის შესახებ" კანონში შემავალი ცვლილებით დროებით ენიჭებათ. ამის თაობაზე დღეს რეგიონული პოლიტიკის, თვითმმართველობისა და მაღალმთიანი რეგიონების კომიტეტის სხდომაზე იმსჯელეს.
კომიტეტის თავმჯდომარის, ვახტანგ ბალავაძის თქმით, აღნიშნული თვითმმართველი ერთეულები საკუთარი და დელეგირებული ფინანსური რესურსის მიმართვას იმ პირთა საყოფაცხოვრებო პირობების გასაუმჯობესებლად მოახდენენ, რომლებიც იძულებით იყვნენ გადაადგილებულნი თავიანთი მუდმივი საცხოვრებელი ადგილიდან.
ასევე, 2013 წლის 1 იანვრამდე თვითმმართველ ერთეულს მიეცემა უფლება, განსაკუთრებულ შემთხვევებში, ნებაყოფლობით გადაწყვიტოს სახელმწიფო მმართველობის ორგანოებისთვის მატერიალურ-ტექნიკური დახმარების გაწევის საკითხი.