დაწესებულების ხელმძღვანელს საჯარო მოსამსახურისთვის ნარკოლოგიური შემოწმების გავლის ნებისმიერ დროს მოთხოვნა აღარ შეეძლება.
მთავრობის შესაბამისი საკანონმდებლო ინიციატივა პარლამენტში უკვე შესულია და მასზე საპროცედურო საკითხთა კომიტეტმა დღევანდელ სხდომაზე იმსჯელა.
"აუცილებლად უნდა განისაზღვოს წელიწადში რამდენჯერ შეიძლება შემოწმდეს საჯარო მოხელე და კანონით დადგინდეს ამ შემოწმებათა რაოდენობის ზღვარი", - განაცხადა კომიტეტის თავმჯდომარემ ხათუნა გოგორიშვილმა.
მისივე თქმით, ეს დაწესებულების ხელმძღვანელს უფლებას არ მისცემს შერჩევით მოაწყოს შემოწმება და საჯარო მოხელე უფროსის სუბიექტივიზმისგანაც დაცული იქნება. ამასთანავე, როგორც მან აღნიშნა, ნარკოლოგიური შემოწმება არც ისე იაფი პროცედურაა და ამაში საბიუჯეტო სახსრები დაიხარჯება, კანონი კი თუ რაოდენობას არ განსაზღვრავს, კონტროლის პალატა მოკლებული იქნება შეაფასოს გაღებული ხარჯების მიზნობრიობა.
საპროცედურო საკითხთა და წესების კომიტეტმა მომხსენებლისგან მოითხოვა, რომ კანონპროექტის პარლამენტის სხდომაზე განხილვამდე მთავრობამ აღნიშნულთან დაკავშირებით საკანონმდებლო ორგანოში კონკრეტული წინადადებები წარადგინოსის, წინააღმდეგ შემთხვევაში კანონმდებლები მას მეორე მოსმენით მხარს არ დაუჭერენ.
ცვლილება "საჯარო სამსახურის შესახებ" კანონში შედის, რომლის მოქმედი რედაქციითაც, დაწესებულების ხელმძღვანელს უფლება ეძლევა ნარკოლოგიური შემოწმების გავლა საჯარო მოსამსახურეს ნებისმიერ დროს მოსთხოვოს.
