დღეს რუსთავის მე-15 საჯარო სკოლაში აშშ-ის ელჩი ჯონ ბასი და განათლების მინისტრი დიმიტრი შაშკინი გამოაცხადებენ სამოქალაქო განათლებისა და პედაგოგთა გადამზადების (ACETT) ახალი პროგრამის დაწყებას.
პროგრამა აშშ-ის მთავრობის მიერ საქართველოსთვის გაწეული დახმარების ნაწილია. მისი ღირებულება 2,69 მილიონ აშშ დოლარს შეადგენს.
სამოქალაქო განათლებისა და პედაგოგთა გადამზადების პროგრამა (ACETT) მიზნად ისახავს საქართველოს სკოლებში სამოქალაქო განათლების ხარისხის გაუმჯობესებას და დემოკრატიულ პროცესებში ახალგაზრდების მონაწილეობის ხელშეწყობას. სამწლიანი პროგრამა საქართველოს 9 რეგიონის 500-მდე სკოლას მოიცავს. პროგრამა აშშ-ის საერთაშორისო განვითარების სააგენტოსა (USAID) და მისი პარტნიორი ორგანიზაციის, "პროგრამა ჰარმონიის" (PH International) მეშვეობით ხორციელდება.
განათლების სამინისტრო და აშშ-ის საერთაშორისო განვითარების სააგენტო (USAID) გააფორმებენ ურთიერთგაგების მემორანდუმს. ღონისძიების მონაწილეებს მიესალმებიან განათლების მინისტრი დიმიტრი შაშკინი და აშშ-ის ელჩი ჯონ ბასი. რუსთავის მე-15 საჯარო სკოლის მოსწავლეები სტუმრებთან ერთად სამოქალაქო განათლებისადმი მიძღვნილ გამოფენას დაათვალიერებენ.
ღონისძიება დღეს, 15 დეკემბერს, 13:00 საათზე გაიმართება.