დღეს, 15 დეკემბერს, პარლამენტის რიგგარეშე სესიაზე მეორე მოსმენით წარადგენენ ინიციატივას დასუფთავების მოსაკრებლის შესახებ.
როგორც იურიდიულ საქმეთა კომიტეტის თავმჯდომარემ პავლე კუბლაშვილმა განმარტა, კანონპროექტში ცვლილებები შევიდა და დასუფთავების მოსაკრებლის ზედა ზღვარი აღარ გაუქმდება.
"კანონით დადგინდება მოსაკრებლის ზედა ზღვარი და მის ფარგლებში შეუძლია მიიღოს საკრებულომ გადაწყვეტილება, რამდენი უნდა იყოს დასუფთავების მოსაკრებელი. ამის გათვალისწინებით მეორე მოსმენაზე მთავრობის მხრიდან დაფიქსირდება, რამდენით განისაზღვრება დასუფთავების მოსაკრებელზე ზედა ზღვარი", - აღნიშნა კუბლაშვილმა.
შეგახსენებთ, რომ "ადგილობრივი მოსაკრებლის შესახებ" საქართველოს კანონში ცვლილების თავდაპირველი ვარიანტის თანახმად, დასუფთავების მოსაკრებლის ზედა ზღვარი უქმდებოდა და თვითმმართველ ორგანოებს შესაძლებლობა ეძლეოდათ, დასუფთავების მოსაკრებელი გაეზარდათ.
აღნიშნული გადაწყვეტილება 10 დეკემბრის პლენარულ სხდომაზე ოპოზიციონერმა დეპიტატმა გია ცაგრეიშვილმა გააპროტესტა და დასძინა, რომ კანონპროექტი კონსტიტუციასთან შეუსაბამობაში მოდიოდა.
უმრაველოსბა შეთანხმდა, რომ დასუფთავების მოსაკრებელის ზედა ზღვარი არ გაუქმდებოდა და ამის მაგივრად კონკრეტული ციფრები გაიწერებოდა კანონპროექტში.
ამჟამად მოქმედი ნორმის მიხედვით, დასახლებული ტერიტორიის დასუფთავებისთვის შემოღებული მოსაკრებელის ოდენობა არ უნდა აღემატებოდეს ამ მომსახურეობის ორგანიზებისა და ადმინისტრირებისთვის საჭირო ხარჯებს.
