დღეს, 15 დეკემბერს, 18:00 საათზე, გაეროს განვითარების პროგრამა (UNDP) წარადგენს ბიზნესისთვის ახალ სახელმძღვანელოს - "სამართლიანად გამარჯვება". გამოცემა კორპორატიული სოციალური პასუხისმგებლობის პროგრამების გატარებას ეხება.
როგორც ორგანიზაციაში აცხადებენ, სახელმძღვანელოში განმარტებულია, როგორ უნდა დაიგეგმოს და განხორციელდეს კორპორატიულ სოციალურ პასუხისმგებლობასთან დაკავშირებული პროგრამები სხვადასხვა ზომისა და მიმართულების ბიზნესის შემთხვევაში.
სახელმძღვანელო საქართველოში არსებულ და საერთაშორისო პრაქტიკას ეყრდობა. მისი მიზანია, ხელი შეუწყოს ქართული კომპანიების კონკურენტუნარიანობის გაზრდას და ქვეყანაში სოციალური კაპიტალის დაგროვებას. სახელმძღვანელოს ავტორები აგრეთვე მიიჩნევენ, რომ სოციალური კორპორატიული პასუხისმგებლობის პროგრამების გატარება მხარს უჭერს საქართველოს ერთ-ერთი სტრატეგიული პრიორიტეტის - ევროკავშირის სტრუქტურებსა და ბაზრებში ინტეგრაციის განხორციელებას.
სახელმძღვანელოში გამოყენებულია ბრიტანული ორგანიზაციის "ბიზნესი საზოგადოებაში" მოდელი.
სახელმძღვანელოს შემუშავებაში აქტიური მონაწილეობა მიიღეს გლობალური შეთანხმების საქართველოს ქსელის წევრებმა და საქართველოს წამყვანმა ბიზნესკომპანიებმა და ორგანიზაციებმა.
სახელმძღვანელოს ხუთი ძირითადი თავი - მიმოხილვა, ბაზარი, სამუშაო ადგილი, საზოგადოება და გარემო - შეიცავს ინფორმაციას იმის შესახებ, თუ რა გზითაა შესაძლებელი მაღალი კორპორატიული სოციალური პასუხისმგებლობის და ბიზნესის მომგებიანობისა და ეფექტურობის შერწყმა.
ღონისძიება სასტუმრო "რადისონ ბლუ ივერიაში" გაიმართება.